ކަޝްމީރުގެ މުސްލިމުން ކުރިމަތިލަމުން އެގެންދަނި ކޮންކޮން ކަންކަމަކާއި ކަން ދެނެހުރީމު ހެއްޔެވެ؟

އެންމެ ފުރަތަމަ ކަމަކަށް އެނގެންޖެހޭ ކަމަކީ، ކަޝްމީރު ރައްޔިތުންގެ މަސައްކަތަކީ އިންޑިއާގެ ރައްޔިތުންނާއި ”ހަމަކަމަ“ ހައްޤުތަކެއް ކަށަވަރުކުރުމަށް ކުރަމުންގެންދާ މަސައްކަތެއް ނޫންކަމެވެ. ކަޝްމީރު މީހުންގެ އެދުމަކީ މިއީ ކަމަށް ގަބޫލުކުރެވޭ މައިގަނޑު ސަބަބަކީ އިންޑިއާގެ ލިބަރަލް ކޮމެންޓޭޓަރުން ފާޅުކުރާ ޚިޔާލުތަކެވެ. މިކަމުގެ ހަގީގަތަށް ނަޒަރު ހިންގާލާއިރު އެނގެނީ، ކަޝްމީރު ރައްޔިތުންގެ މަސައްކަތަކީ އިންޑިއާގެ އަސްކަރީ ބާރުން މުސްލިމުންނާއި ދެމެދު އޮންނަ ނަފްރަތުގެ ސަބަބުން، މުސްލިމުން ނަތްތާލުމަށް ބާރުގެ ބޭނުންކޮށް، ކަޝްމީރަށް ވެރިވެގަނެ، އަތްގަދަކުރަމުންދާ ދިޔުމުގެ ނަތީޖާއެއްގެ ގޮތުން ކުރާ މަސައްކަތްތަކެއް ކަމެވެ.

މިގޮތުން، މުސްލިމު އަންހެނުންގެ އައުރައިގެ މުހިންމު ބައެއްކަމުގައިވާ ”ހިޖާބް“ އަކީ އިސްލާމްދީނުގައި ”މުހިންމު“ އެއްޗެއް ނޫންކަމަށާއި، ދީނީ މިނިވަންކަމުގެ އަސާސްގެ ތެރެއިން އެކަން ބަލައި ނުގަނެވޭނެކަމަށް އިންޑިއާގެ ކަރްނާޓަކާ ސްޓޭޓްގެ ހައި ކޯޓަކުން މާރޗް 2022 ގައި ވަނީ ނިންމާފައެވެ. އަދި މަދަރުސާއަށް ކިޔަވާން ދާއިރު ހިޖާބް އެޅުމަކީ މަނާކަމެއްކަމަށް ބުނެ އެސްޓޭޓުން ނެރުނު އަމުރު އެކޯޓުން ވަނީ ދަމަހައްޓައިދީފައެވެ. ހަމައެއާއެކު، މާގިނަ ދުވަސްތަކެއް ނުވަނީސް، ކަރްނާޓަކާ ސްޓޭޓްގެ ތައުލީމާއި ބެހޭ ވަޒީރު ވަނީ ހިންދޫންގެ ދީނީ ފޮތެއްކަމުގައިވާ ”ބަގަވަތް ގީތާ“ ސްކޫލްތަކުގެ ކަރިކިއުލަމްގައި ކިޔަވައިދިނުން މަޖުބޫރުކުރާނެކަން އިއުލާނުކޮށްފައެވެ. އެވުޒާރާއިން ބުނެފައިވާގޮތުގައި ބަގަވަތް ގީތާއަކީ ”ހަމައެކަނު ހިންދޫންނަށް އެނގުން މުހިންމު ފޮތެއް ނޫން“ ކަމަށާއި، ”އެންމެންވެސް ދަސްކުރުން މުހިންމު“ ފޮތެއްކަމަށެވެ.

އިންޑިއާ ސަރުކާރުގެ ސިޔާސަތުތަކާއި، ހިންގުމުގެ ވައްޓަފާޅި އޮތީ އެގައުމުގެ ބޮޑުވަޒީރު ނަރެންދްރަ މޯދީގެ ހިންދޫދީނާއި ގުޅި ލާމެހިފައެވެ. ރައިޓް ވިންގުގެ ގިނަ ސިޔާސީވެރީންނެކޭ އެއްފަދައިން، ނޭޝަނަލިޒަމްގެ އައްޑަނައިގެ ދަށުން އިގްތިޞާދީ ދަތިތަކުން އަރައިގަނެ ގައުމު ތިޔާގިވާނެކަމަށް ބުނެ، އިންޑިއާގެ ބީޖޭޕީ ގެ ލީޑަރުން ބޭނުންވާ ޕްރޮޕަގަންޑާތައް ފަތުރަމުން އަންނަތާ އެތަކެއް އަހަރުތަކެއް ވެފައިވާއިރު، ހިންދޫ ދީނުގެ ޕްރޮޕަގަންޑާއާއި ނޭޝަނަލިޒަމް މަސްހުނިކޮށް ކުޅެމުންގެންދަނީ ރައްޔިތުންގެ ޖަޒުބާތާއެވެ. ވޯޓު ހޯދުމުގެ ބޭނުމުގައެވެ. މިގޮތުން، ބޮޑުވަޒީރު މޯދީއާއި އޭނާގެ ޕާޓީއިން ރައްޔިތުންނަށް ކިޔައިދީފައިވަނީ ގިނަ މައްސަލަތަކުގެ ފަހަތުގައި އޮތީ މުސްލިމުންގެ ކުށްކަމުގައެވެ. އަދި މުސްލިމުންނާއި އިސްލާމްދީނާއި ދެކޮޅަށް ބިރުވެރިކަން އުފެއްދުމުގެ ގޮތުން ގިނަ ވާހަކަތަކެއް ފަތުރާފައިވާއިރު، ހިންދޫ ވޯޓަރުގެ ހަމްދަރުދީ ލިބުމުގެ އިތުރުން، މުސްލިމުންނަށް ގިނަގުނަ ހަރުކަށި ހަމަލާތަކެއްވެސް މިހާތަނަށް ވަނީ އަމާޒުވެފައެވެ. އެގޮތުން، މުސްލިމު ވިޔަފާރިވެރީންގެ ވިޔަފާރިތަކަށާއި، މުސްލިމު އަންހެނުންނަށް ޖިސްމާނީ އަނިޔާދީ ރޭޕުކުރުމުގެ އިތުރުން، މުސްލިމުން ރަހީނުކޮށް ގޭންގުތަކުން ވަނީ އެމީހުނަށް އަނިޔާކޮށް މަރާފައެވެ. މިއީ އިންޑިއާގެ މުސްލިމުން ނައްތާލައި އަތްދަށުކުރުމަށް ކުރެވޭހާ މަސައްކަތެވެ.

އިންޑިއާގެ ކޮންޓްރޯލްގެ ދަށުން ވެރިކަންކުރި މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ސަރުކާރުގެ ވެރިކަމަށްފަހު، އިންޑިއާ ސިފައިނާއި ދެކޮޅަށް ކަޝްމީރުގެ މުސްލިމުންކުރާ މަސައްކަތުގެ ވާހަކަތައް ފަނޑުވެގެން ގޮސްފައިވާއިރު، އެއިރުގެ ސިޔާސިވެރީން ތިބީ އިންޑިއާއާއި ދެކޮޅަށް ކުޑައިމީސް ބަހެއް ބުނަން ޖެހިލުންވެފައެވެ. ދިވެހިރާއްޖެއަށް އޮތް އިންޑިއާގެ ނުފޫޒު އެހާވެސް ބޮޑެވެ. މީގެ އިތުރުން، ސަރުކާރުން ގެންދިޔައީ ސީދާގޮތުންނާއި ނުސީދާގޮތުން އިންޑިއާގެ މަސްލަހަތު އޮންނަ ކުންފުނިތަކަށް ދިވެހިރާއްޖޭގެ ޕްރޮޖެކްޓްތައް ހަވާލުކުރަމުންނެވެ.

ހަމައެއާއެކު، ބޭރުގެ ގައުމުތަކަށް ޖާސޫސުން ފޮނުވައިގެން މައުލޫމާތު އެއްކޮށް، ބޮޑުވަޒީރު މޯދީއާއި ދެކޮޅަށް ބަސްބުނާ ފަރާތްތަކަށް ޖިސްމާނީ ގޮތުން ގެއްލުންދިނުމަކީ އިންޑިއާ ސަރުކާރުން އާންމުކޮށް ކުރާކަމެކެވެ. ކެނެޑާގެ އިންޓެލިޖެންސް އޭޖެންސީގެ އިތުރުން އިތުރު ބައެއް ގައުމުތަކުން މިކަން ފާހަގަކޮށް، މޯދީ ސަރުކާރާއި ދެކޮޅު އެކްޓިވިސްޓުން މަރައި، މޯދީ ސަރުކާރުން ކުރާ އެފަދަ ނާތަހުޒީބު މަސައްކަތްތައް ކުށްވެރިކޮށްފައިވެއެވެ.

މިހުރިހައި ކަމަކާއި އެކުވެސް، ކަޝްމީރު ރައްޔިތުން އިންޑިއާ ސަރުކާރާއި ދެކޮޅަށް ކުރާ މަސައްކަތުގައި އެއްވެސް އެއްބާރުލުމެއް ނުލިބޭފަދައެވެ. އަދި ހާއްސަކޮށް އިންޑިއާގެ ރުހުން ހޯދުމަށްޓަކައި، މުސްލިމް ގައުމުތައް މިމައްސަލާގައި ހަނި ތިބޭ ތިބުމަކީ ގަބޫލުކުރެވޭނެކަމެއް ނޫނެވެ. މުސްލިމް ބައެއްގެ މައްޗަށް ވެރިވެގަނެ އަތްގަދަކުރުމަށް ބޭނުންވާ އުކުޅުތައް އިންޑިއާއިން ދަސްކުރަނީ އެތައް އަހަރުތަކެއް ވާންދެން ފަލަސްތީނު ރަތއްޔިތުން ހާލުގައި ޖައްސާ އަނިޔާވެރިވަމުންގެންދާ އިޒްރޭލުގެ ކިބައިންނެވެ. އަދި އޭޝިއާ ކުންފުނިތަކުގެ ތެރެއިން ފަލަސްތީނުގެ ރައްޔިތުން ނައްތާލުމަށް އިޒްރޭލަށް ހަތިޔާރު ފޮނުވައިދެނީ ހަމައެކަނި އިންޑިއާގެ މަސްލަހަތު އޮންނަ ކުންފުނިތަކުންނެވެ.