ދައުލަތުގެ ކުންފުނިތަކާ ގުޅުންހުރި 896 މައްސަލައެއް ބަލަމުން އަންނަ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފިއެވެ.
ރައްޔިތުންގެ މަޖިލީހުގައި ވާހަކަ ދައްވަމުން އޭސީސީގެ ރައީސް އާދަމް ޝާމިލް ވިދާޅުވީ އެ ކޮމިޝަނުން ދެ މަރުހަލާއަކަށް ބަހާލައިގެން މައްސަލަތައް ބަލަމުން ގެންދާ ކަމަށެވެ.
އެ ދެ މަރުހަލާއަކީ ފުރަތަމަ ޕްރިލިމިނަރީ މަރުހަލާއާއި އިތުރަށް މައްސަލަ ބެލުމުގެ މަރުހަލާ ކަމަށް އޭނާ ވިދާޅުވިއެވެ.
ޝާމިލް ވިދާޅުވި ގޮތުން, މިހާރު ޕްރިމިލަނީ މަރުހަލާގައި ދައުލަތުގެ ކުންފުނިތަކާ ގުޅުންހުރި 316 މައްސަލައެއް އެބަ އޮތެވެ. އަދި ހަމައެހެންމެ އިތުރަށް ތަހުގީގު ކުރާ މަރުހަލާގައި 580 މައްސަލަ އެބަ އޮތް ކަމަށާއި މިއީ ކަންބޮޑުވާން ޖެހޭ ވަރުގެ އަދަދެއް ކަމަށް އޭނާ ވިދާޅުވިއެވެ.
މީގެއިތުރުން މިދިޔަ ރިޔާސީ އިންތިޚާބާއި މަޖިލިސް އިންތިޚާބަށް އިޝާރަތް ކުރައްވަމުން ޝާމިލް ވިދާޅުވީ އިންތިޚާބުގެ ދުވަސްވަރުގައި އޭސީސީއަށް ވަރަށް ގިނަ މައްސަލަތައް ރިޕޯޓު ކުރި ކަމަށެވެ.
ޝާމިލް ވިދާޅުވީ އޭސީސީގެ މައިގަނޑު ދައުރަކީ މައްސަލަތައް ތަހުގީގު ކުރުން ކަމަށާއި އެއަށްފަހު ދައުވާ ކުރެވޭނެ ވަރުގެ މައްސަލައެއްނަމަ, ޕްރޮސެކިއުޓާ ޖެނެރަލްގެ އޮފީހަށް ހުށަހެޅުން ކަމަށެވެ.
ކުންފުނިތަކާ ގުޅުންހުރި 896 މައްސަލައެއް ބަލަމުން އަންނަ ކަމަށް ޝާމިލް ވިދާޅުވިއިރު ފެނަކައާ ގުޅޭ ކޮރަޕްޝަންގެ މައްސަލަތައް އާދަޔާ ޚިލާފަށް ގިނައިން ހުށަހެޅިފައިވާ ކަމަށާއި އެއިން ބޮޑު 6 މައްސަލައެއް ބަލަމުންދާ ކަމަށް ވެސް އޭނާ ވިދާޅުވިއެވެ.
