އަނިޔާވެރި ގޮތަކަށް ފުލުހުން މީހަކު ހައްޔަރުކުރާ މަންޒަރު އާންމުވެ އާންމުންގެ ފާޑުކިޔުން އަމާޒުވެފައި ވަނިކޮށް އެ މައްސަލަ ތަހުގީގު ކުރަން ފުލުހުންގެ ފަރާތުން ޕްރޮފެޝަނަލް ސްޓެންޑަރޑްސް ކޮމާންޑް އަދި ނެޝަނަލް އިންޓެގްރިޓީ ކޮމިޝަންގައި އެދިއްޖެއެވެ.
މިކަންހާމަކޮށް ފުލުހުންގެ ތަރުޖަމާނު އަހުމަދު ޝިފާން ވިދާޅުވީ، ފުލުހުންގެ ފަރާތުން، މިފަދަ އެއްވެސް އަމަލަކީ ފުލުހުންގެ ހަމަތަކުގެ ތެރެއިން ބަލައިގަނެވޭނެ އަމަލެއް ނޫން ކަމަށެވެ.
އެގޮތުން މި ހާދިސާ ތަހުގީގު ކުރުމަށް ޕްރޮފެޝަނަލް ސްޓެންޑަރޑްސް ކޮމާންޑް އަދި ނެޝަނަލް އިންޓެގްރިޓީ ކޮމިޝަންގައި ފުލުހުން މިހާރު އެދިފައިވާ ކަމަށެވެ.
މީގެ އިތުރުން އެއްވެސް މިންވަރެއްގެ އަނިޔާވެރި އަމަލަކަށް ދިވެހި ފުލުހުން ހިތްވަރުނުދޭނެ ކަމުގައި ޝިފާން ވިދާޅުވިއެވެ.
އާއްމުވެފައިވާ ވީޑިއޯއިން ފެންނަނީ ބިން މައްޗަށް ވެއްޓިފައި އޮތް މީހެއްގެ ގައިމައްޗަށް ފުލުހަކު އެއް ފައިން އަރާ އިންނަ އިރު އިތުރު ފުލުހަކު އެ މީހާގެ އަތުގައި ހިފަހައްޓާ އަތް ލަންބުވައިލާ މަންޒަރެވެ.
އެނގިފައިވާ ގޮތުގައި މި ހާދިސާ ހިނގާފައި ވަނީ ފުވައްމުލައް ސިޓީގައެވެ.
