ސަރުކާރުން ކުރިއަށް ގެންގޮސްފައިވާ ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ގުޅީފަޅަށް ބަދަލުވުމަށް ހުޅުވައިލި ފުރުސަތުގެ ދަށުން އެކަމަށް އެދި 2210 ފަރާތަކުން ހުށަހަޅައިފިއެވެ.

މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން މިއަދު ކުރި އިއުލާނެއްގައި ވަނީ ގިރާވަރުފަޅުން ގޯތި ލިބިފައިވާ ފަރާތްތަކަށް ގުޅީފަޅަށް ބަދަލުވުމަށް ހުޅުވާލި ފުރުސަތުގެ ދަށުން އެކަމަށް އެދި ހުށަހެޅި ފަރާތްތަކުގެ ތަފްސީލު އާންމުކޮށްފައެވެ.

މި ފަރާތްތަކުގެ ތެރެއިން 1250، 1650  2050 އަދި 2450 އަކަފޫޓު ގެ ގޯތި ބަދަލުކުރުމަށް ހުށަހަޅާފައިވާ ފަރާތްތަކުގެ ލިސްޓުތައް މި އިއުލާނާއެކު ހިމަނާފައިވެއެވެ.

މިނިސްޓްރީން ބުނީ ގުޅީފަޅަށް ގޯތި ބަދަލުކުރުމަށް ހުށަހަޅާފައިވާ ފަރާތްތަކުގެ ތެރެއިން 1250 އާއި 1650 އަކަފޫޓުގެ ގޯތި ބަދަލުކުރުމަށް ހުށަހަޅާފައިވާ ފަރާތްތަކުގެ އަދަދު ގުޅީފަޅަށް ބަދަލުކުރުމަށް ކަނޑައެޅިފައިވާ ގޯތީގެ އަދަދަށްވުރެ ގިނަކަމުގައިވާތީ ގުޅީފަޅަށް ގޯތި ބަދަލުކުރެވޭ ފަރާތްތައް ކަނޑައެޅުމަށް ހަމަޖެހިފައިވަނީ އެ ފަރާތްތަކުގެ މެދުގައި ބޭއްވޭ ގުރުއަތަކުންކަމަށެވެެ. އަދި ގުރުއަތު ނެގުން ޖޫން 4 އަންގާރަ ދުވަހު ބޭއްވުމަށް ހަމަޖެހިފައިވާ ކަމަށާއި ގުރުއަތުލުން ބޭއްވުމަށް ހަމަޖެހިފައިވާ ތަނާއި ގަޑި ފަހުން އިއުލާނެކުރާނެ ކަމަށެވެ.

މިނިސްޓްރީން ބުނީ އިއުލާނު ކުރެވުނު ގޯތީގެ އަދަދާއި ގޯތި ބަދަލުކުރުމަށް ހުށަހެޅި ފަރާތްތަކުގެ އަދަދަށް ރިއާޔަތްކޮށް، 2450 އަކަފޫޓާއި 2050 އަކަފޫޓުގެ ގޯއްޗަށް އެދި ހުށަހަޅާފައިވަނީ ކަނޑައަޅާފައިވާ އަދަދަށްވުރެ މަދުންކަމުގައިވާތީ އެ ފަރާތްތަކުގެ މެދުގައި ގުރުއަތުލުމެއް ނޯންނާނެ ކަމަށެވެ. އަދި ގުޅީފަޅުން ލިބޭ ގޯތި ކަނޑައެޅުމަށް ހަމަޖެހިފައިވަނީ ގުރުއަތުންކަމާއި މި ގުރުއަތު ނެގުން އޮންނާނެ ތާރީޚެއް ފަހުން އިޢުލާނެކުރާނެ ކަމަށެވެ.

ގިރާވަރުފަޅުން ލިބިފައިވާ ގޯތި ގުޅީފަޅަށް ބަދަލުކުރުމަށް އެދި ހުށަހެޅި ފަރާތްތަކުގެ ލިސްޓު އާންމުކޮށް މިނިސްޓްރީން ވަނީ މި ލިސްޓާ ގުޅޭ ގޮތުން ޝަކުވާއެއްވާނަމަ އެކަން ލިޔުމަކުން 31 މެއި ވާ ހުކުރު ދުވަހުގެ 23:00 ގެ ކުރިން އެ މިނިސްޓްރީއަށް ހުށަހެޅުމަށް އެދިފައެވެ.

އިތުރު މައުލޫމާތު ސާފުކުރަން ބޭނުންވާ ފަރާތްތަކުން ތިރީގައިވާ ނަންބަރުތަކަށް ރަސްމީ ގަޑީގައި ގުޅުމަށް ވަނީ އެދިފައެވެ.

ގުޅޭނެ ނަންބަރުތައް: 3020809,320810,3020812

އީމެއިލް މެދުވެރިކޮށް ޝަކުވާ ހުށަހެޅުމަށް:  [email protected]

ހިޔާވަހި ޕޯޓަލް މެދުވެރިކޮށް ޝަކުވާ ހުށަހެޅުމަށް:  https://hiyaavehi.housing.gov.mv/