ހއ.އަތޮޅުން ފެށިގެން ވ.އަތޮޅަށް ނެރުނު އޮރެންޖު އިންޒާރުގެ ވަގުތު އިތުރުކޮށްފިއެވެ.

މޯލްޑިވްސް މީޓިއޮރޮލޮޖިކަލް ސަރވިސްއިން ބުނީ ހއ.އަތޮޅުން ފެށިގެން ވ.އަތޮޅަށް ނެރުނު އޮރެންޖު އިންޒާރުގެ ވަގުތު މިރޭ 19:15 އިން ފެށިގެން 23:15 އާ ހަމައަށް އިތުރުކޮށްފައިވާ ކަމަށެވެ.

އެ އަތޮޅުތަކަށް ގަދަވަޔާއެކު ބޯކޮށް ވާރޭވެހޭނެ ކަމަށާއި ކަނޑުތައް ވަރަށް ގަދަވާނެ ކަމަށް ވަނީ ލަފާކޮށްފައެވެ.

އަދި އެ އަތޮޅުތަކަށް ގަޑިއަކު 34 މޭލާއި 40 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 60 މޭލަށް ވައިގަދަވާނެ ކަމަށް ވެސް ވަނީ ލަފާކޮށްފައެވެ.

މީޓިއޮރޮލޮޖިކަލް ސަރވިސްއިން ހާމަކުރި ގޮތުގައި ދެކުނުގެ އަތޮޅުތަކަށް މިރޭ ކެރީގެ އަސަރު ފޯރާނެއެވެ.

ހުކުރު ދުވަހާއި ހޮނިހިރު ދުވަހަށް ބަލާއިރު އެ ދެ ދުވަހުގައި ވެސް އުތުރާއި މެދުރާއްޖެތެރެއަށް ގަދަވަޔާއެކު ވިއްސާރަ ކުރާނެ ކަމަށާއި އަދި ދެކުނުގެ ކެރީގެ އަސަރު ފޯރާނެ ކަމަށް ވަނީ ލަފާކޮށްފައެވެ.