ރެޑްސީގެ ތެރެއިން ދަތުރުކުރާ ބޯޓުފަހަރަށް އަމާޒުކޮށް ޙަމަލާ ދިނުމަށް ޔަމަނުގެ ހޫތީން މިހާރު ބޭނުން ކުރަމުންގެންދާ ބެލިސްޓިކް މިސައިލް ދުވެލި އަތުޖެހޭވަރަށް ވުރެން މާ ބާރު ކަމަށް ރެޑްސީގައި ޙަރަކާތްތެރި ވަމުން ގެންދާ އެމެރިކާގެ ކަނޑުސިފައިންގެ ލަޝްކަރުގައި ހިމެނޭ ޑެސްޓްރޯޔަރގެ ކެޕްޓަން ބިޒްނަސް އިންސައިޑަރ އަށް ކިޔައިދީފިއެވެ.

ކެޕްޓަން އޮޅުންފިލުވާދީފައިވާ ގޮތުގައި މިއީ އެމެރިކާގެ ކަނޑުސިފައިން މީގެކުރިން ދެކިފައިނުވާ ޙާލަތެކެވެ. މިހާތަނަށް އޭގެތެރެއިން މިސައިލެއް ހަލާކު ކޮށްލެވިފައިވީނަމަވެސް އެ މިސައިލްތަކުގެ ދުވެލި އާދަޔާޚިލާފަށް ބާރުކަމުގައި ގަބޫލުކުރަން ޖެހެއެވެ.    

އެންޓި ޝިޕް ބެލިސްޓިކް މިސައިލަކީ މިހާތަނަށް ކުރެވުނު އެއްވެސް ހަނގުރާމައެއްގައި ބޭނުން ކޮށްފައިނުވާ ނުރައްކާތެރި ހަތިޔާރެއް ކަމަށާއި މެދުއިރުމަތީގައި އުފެދިފައިވާ މި ނުރައްކާތެރި ދަނޑިވަޅުގައި ރެޑްސީ ތެރެއިން ދަތުރުކުރާ އުޅަނދުފަހަރަށް ޙަމަލާދިނުމުގައި ހޫތީ މުޖާހިދުންގެ އެންމެ އަތްމަތީ ހަތިޔާރަކަށް ބެލިސްޓިކް މިސައިލް ވެގެން ދިއުމަކީ ނުރައްކާތެރިކަން ބޮޑު ޙާލަތެއްކަމަށް އޭނާބުންޏެވެ.

އީރާނުގެ މަދަދު ލިބެމުންދާ ހޫތީ ޖަމާއަތުން ރެޑްސީ އާއި ގަލްފް އޮފް އަދަންގެ ތެރެއިން ދަތުރުކުރާ ބޯޓުފަހަރަށް އަމާޒުކޮށް ބެލިސްޓިކް މިސައިލް ބޭނުންކޮށްގެން އެތައް ޙަމަލާއެއް ވަނީ ދީފައެވެ. އޭގެ ތެރެއިން ބައެއް ޙާލާތައް ބޯޓުފަހަރަށް އަމާޒުވެ މިދިޔަ މާރޗް މަހުގެ ތެރޭގައިވެސް ބައެއް ބޯޓުފަހަރުގައި ރޯވެ ބައެއް ފަޅުވެރިން ވަނީ މަރުވެފައެވެ.                                                        

އެމެރިކާގެ ގައިޑެޑް މިސައިލް ޑެސްޓްރޯޔަރ ޔޫ އެސް އެސް ކާރނީގެ ކޮމާންޑިންގ އޮފިސަރ ކެޕްޓަން ޖެރެމީ ރޮބާރޓްސަން މިދިޔަ ހޯމަ ދުވަހު ރިޕޯރޓަރުންނަށް ކިޔާދީފައިވާ ގޮތުގައި ހޫތީންގެ ބެލިސްޓިކް މިސައިލް ޙަމަލާތަކަކީ ވަރަށް ބޮޑު ނުރައްކަލެކެވެ. 

އަހަރެމެންނަށް އެ މިސައިލްތައް ވަގުތުއޮއްވާ ދެނެގަތުމުގެ ވަސީލަތްތައް ލިބިފައި އޮތްނަމަވެސް އެ މިސައިލްތަކުގެ ދުވެލި ކުރިން ދެނެގަނެވިފައިނުވާ ދަތުރުކުރުމުގެ ބާރުމިނުން އޭގެ އަމާޒަށް ވާސިލުވުމުގެ ކުރިން ލިބެނީވަރަށް ކުޑަ ހިނދުކޮޅެކެވެ. އެ ވަގުތުކޮޅު އެއްވެސް ސަބަބަކާހުރެ ގެއްލިއްޖެނަމަ ދެން ކުރިމަތިލާން ޖެހޭނެ ނުރައްކާ ތެރިކަން ވަރަށް ބޮޑުވެއެވެ.                                

މިދިޔަ އަހަރު އޮކްޓޯބަރ މަހުގެ ފަހުން ރެޑްސީގައި ހޫތީން ދެމުން ގެންދާ ބެލިސްޓިކް މިސައިލް ޙަމަލާތައް ދެނެގަތުމުގެ ވަސީލަތްތައް ގާއިމް ކުރެވިފައިވަނީ ހަމައެކަނި ޔޫ އެސް އެސް ކާރނީ ގައެވެ. އަދި މިހާތަނަށް އެ ޑިސްޓްރޯޔަރުން ވަނީ ހޫތީންގެ އެތައް ޙަމަލާއެއް ކާމިޔާބު ކަމާއެކު ނައްތާލާފަކަމަށް ބުނެއެވެ.                

އިންސްޓިޓިއުޓް އޮފް އިންޓަރނޭޝަނަލް ސްޓްރެޓީޖިކް ސްޓަޑީޒްއިން ހާމަކޮށްފައިވާ ގޮތުގައި ހޫތީ މުޖާހިދުންގެ އަތުގައި އެންޓި ޝިޕް ބެލިސްޓިކް މިސައިލްގެ ބަރަށްބޮޑު ސްޓޮކެއް އެބަހުއްޓެވެ. 

ހަމައެއާއެކު ހޫތީންނާއި އިދިކޮޅު ފަރާތްތަކަށް އެއްގަމު މަގުން ޙަމަލާދިނުމަށްޓަކައި ވަރަށް ގިނަ އަދަދެއްގެ ޑްރޯނާއި ކްރޫޒް މިސައިލްވެސް އެ ޖަމާޢަތުގެ ބެލުމުގެ ދަށުގައި އެބަހުއްޓެވެ.ބައެއް މިސައިލް ތަކަކީ އީރާނުގެ އުފެއްދުންކަމަށް އެމެރިކާއިން ބުނެއެވެ. އަދި ބައެއް މިސައިލްތަކަކީ އީރާނުގެބައިތަކަކާއެކު ހޫތީންގެ އުފެއްދުމެއްކަމަށްވެސް އެމެރިކާއިން ބުނެއެވެ.

އެންޓި ޝިޕް ބެލިސްޓިކް މިސައިލްގެ ނުރައްކަލާ ކުރިމަތި ލުންވެސް ވަކިން ނުރައްކާތެރިކަން ކުޑައެއްނޫނެވެ. އޭގެ ދުވެލި ކްރޫޒް މިސައިލަށްވުރެން މާ ބާރީއެވެ. އާދައިގެ މިސައިލް ދެނެގަނެވޭހާ ފަސޭހައިން އެންޓި ޝިޕް ބެލިސްޓިކް މިސައިލް ދެނެގަނެވޭނެ ފުރުސަތެއް ނުލިބެއެވެ. 

ޑެސްޓްރޯޔަރގައި އެކަމަށް ވަރަށް ޚާއްސަ ތަމްރީނުތަކެއް މެދުނުކުނޑި ހިންގަމުން ގެންދެވެއެވެ. މިބާވަތުގެ މިސައިލް ދެނެގަނެ ކަށަވަރުކޮށް ބޭނުންވާ ފިޔަވަޅު އަޅަން ލިބޭނީ ހަމައެކަނި 9 ސިކުންތާއި 20 ސިކުންތާ ދެމެދުގެ ވަގުތު ކޮޅެކެވެ.

މިއަހަރުގެ ކުރީ ކޮޅު އެމެރިކާގެ އެއަރކްރާފްޓް ކެރިއަރ ޔޫ އެސް އެސް ޑްވައިޓް ޑީ. އައިޒެންހާވަރ އާއި އެއަރކްރާފްޓް ކެރިއަރ ޔޫ އެސް އެސް ގްރޭވްލީ ގެ އޮފިސަރުންވެސް ހޫތީންގެ މިސައިލްތަކުގެ ނުރައްކާތެރިކަން ބިޒްނަސް އިންސައިޑަރ އަށް އޮތީ އޮޅުން ފިލުވާދީފައެވެ. އަދި ހަމަ އެއާއެކު އެ އުޅަނދުފަހަރުގައި ދެވެމުންގެންދާ ވަގުތާ ޙާލަތާ ގުޅޭ ތަމްރީނު ތަކުގެ މަޢުލޫމާތުވެސް ބިޒްނަސް އިއްސައިޑަރއާއެކު ޙިއްސާކޮށްފައި ވެއެވެ.

ހޫތީންގެ ޙަމަލާތަކަށްވުރެން ކުރިން ޕެސިފިކް ކަނޑުގައި ޗައިނާގެ ކަނޑު ސިފައިންގެ ފަރާތުންވެސް އެންޓި ޝިޕް ބެލިސްޓިކް މިސައިލް އެމެރިކާ ކަނޑުގެ ސިފައިން އޮތީ ތަޖުރިބާ ކުރަން ޖެހިފައެވެ. އެމެރިކާއާއި ޗައިނާގެ ދެކޮޅުވެރި ކުރިމަތި ލުމެއްގައި ޗައިނާގެ ދުރު ރާސްތާ މިސައިލްތަކާއިއެމެރިކާއިން ކުރިމަތިލާން ޖެހޭނެއެވެ. 

އެމެރިކާގެ ކަނޑު ސިފައިންގެ ބައެއް އޮފިސަރުން ބިޒްނަސް އިންސައިޑަރ އަށް އޮޅުންފިލުވާ ދީފައިވާ ގޮތުގައި ހޫތީންގެ އެންޓި ޝިޕް ބެލިސްޓިކް މިސައިލްތައް ޗައިނާގެ މިސައިލްތަކާ ތަފާތުވާނެއެވެ. އެހެންނަމަވެސް މިހާރު ހޫތީންނާއި ދެކޮޅަށް އެމެރިކާ ކަނޑު ސިފައިން ދެމުން ގެންދާ ޙަމަލާތަކުގެ ސަބަބުން މިއަށްވުރެންވެސް ނުރައްކާތެރި ޙާލަތެއްގައި ބޭނުންކުރާނެ ރަނގަޅު ތަޖްރިބާތަކެއް ލިބެމުންދާނެއެވެ.

ޔޫ އެސް އެސް ކާރނީ މިހާރު އޮތީ މެޑިޓެރޭނިއަން ކަނޑުގައެވެ. މި މަހުގެ ކުރީކޮޅު އީރާނުން އިސްރާއީލަށް ދިން ޙަމަލާގައި ބޭނުން ކުރި ބައެއް މިސައިލް ޔޫ އެސް އެސް ކާރނީ އިންވެސް ހަލާކު ކޮށްލިއެވެ.

އެމެރިކާގެ އޮފިޝަލުން ބުނެފައިވާ ގޮތުގައި މިދިޔަ އާދީއްތަ ދުވަހު ހޫތީން ދިން ބެލިސްޓިކް  މިސައިލް ޙަމަލާއެއް ގްރީކުގެ ތެޔޮ އުފުލާ ބޯޓަކަށް ވަނީ އަމާޒުވެފައެވެ. އެއީ ޕެނަމާގައި ރަޖިސްޓަރީ ކޮށްފައިވާ “ އެމް. ޓީ. ވިންޑް “ ގެ ނަން ދެވިފައިވާ ޓޭންކަރެކެވެ. އެ ޓޭންކަރ އަށް ޙަމަލާ އަރާފައިވަނީ ރަޝިޔާގައި މަރާމާތަށް ބީއްސުމަށްފަހު މަރާމާތުކޮށް ނިމުމުން ޗައިނާއަށް ދަތުރުކުރަމުން ދިޔަމަގުމަތީ ގައެވެ.        

ޓޭންކަރަށް މިސައިލް ޙަމަލާ އެރުމުގެ ސަބަބުން ބޯޓު ތެރެއަށް ލޮނުގަނޑުވަދެ އިންޖީނު ހުއްޓާލަން ޖެހުނެވެ. ބޯޓުން ފޮނުވި ޑިސްޓްރެސް މެސެޖަށް އެ ސަރަހައްދުގައި ޙަރަކާތް ތެރިވަމުންދިޔަ ކަނޑު ސިފައިންގެ އުޅަނދުފަހަރުން އިޖާބަ ދިން ކަމަށް އޭނާ ބުނެއެވެ. އެހެންނަމަވެސް ޓޭންކަރަށް މެދުވެރިވި މައްސަލަތައް ފަޅުވެރިން ޙައްލުކުރުމަށްފަހު ބޯޓުގެ ދަތުރު ކުރިއަށް ގެންދިޔައީ ކަމަށް ސެންޓްރަލަ ކޮމާންޑުން ބުނެފައިވެއެވެ.       

ފަހަކަށް އައިސް ރެޑްސީ ތެރެއިން ކުރާ ދަތުރުތައް މަދުވެ ދަތުރުތަކުގެ ޚަރަދު ކިތަންމެ ބޮޑު ވިޔަސް ބޯޓުފަހަރުން އެހެން މަގުތައް ޚިޔާރުކުރުން އޮތީ މަޖްބޫރު ވެފައެވެ. މި ސަބަބަށްޓަކައި ހޫތީ މުޖާހިދުންގެ ޙަމަލާތައްވެސް ވަނީ މަދުވެފައެވެ. ހޫތީންގެ ތަރުޖަމާނު ވިދާޅުވަނީ ގާޒާގައިވާ އަހަރެމެންގެ އަޚުންނަށް ދެމުންގެންދާ އަނިޔާތަށް ނިމުމަކަށް ގެނެވެންދެން އިސްރާޢީލާއި އޭނާގެ ބައިވެރީންގެ އަމާޒްތަކަށް ޙަމަލާތައް ދެމުންގެންދާނެ ކަމަށެވެ.