ސަރުކާރުގެ އަމާޒަކީ، ރައްޔިތުންގެ މަޖިލިސް އިންތިޚާބުން ލިބުނު ’ސުޕަރ މެޖޯރިޓީ‘ ބޭނުންކޮށްގެން ރައްޔިތުންނަށް ބޭނުންވާ ޚިދުމަތްތައް އެންމެ ފުރިހަމަ ގޮތެއްގައި ފޯރުކޮށްދިނުމަށް ކަމަށާއި ސުޕަރ މެޖޯރިޓީގެ ބޭނުން ނަހަމަ ގޮތުގައި ނުހިފާނެކަމަށް ސަރުކާރުން ބުނެފިއެވެ.
މިދިޔަ ހަފުތާގެ އާދިއްތަ ދުވަހު ބޭއްވި 20 ވަނަ ރައްޔިތުންގެ މަޖިލިސް އިންތިޚާބުގައި ސަރުކާރު ހިންގާ މައި ޕާޓީ ޕީއެންސީއިން ވަނީ 70 އަށްވުރެ ގިނަ ގޮނޑި ހޯދައިފައެވެ.
އަދި އަމިއްލަ ގޮތުން ހޮވުނު ބައެއް މެންބަރުން މިހާރު ވަނީ ޕީއެންސީއާ ގުޅިފައެވެ.
ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ހީނާ ވަލީދު އިއްޔެ ވިދާޅުވީ ސަރުކާރުގެ އަމާޒަކީ، ރައްޔިތުންގެ މަޖިލިސް އިންތިޚާބުން ލިބުނު ’ސުޕަރ މެޖޯރިޓީ‘ ބޭނުންކޮށްގެން ރައްޔިތުންނަށް ބޭނުންވާ ޚިދުމަތްތައް އެންމެ ފުރިހަމަ ގޮތެއްގައި ފޯރުކޮށްދިނުން ކަމަށެވެ.
އަދި އެންމެ އެކަށީގެންވާ ގޮތެއްގައި ރައްޔިތުންނަށް ޚިދުމަތްތައް ފޯރުކޮށްދެވޭނެ ނިޒާމެއް ގާއިމުކުރުންކަމުގައެވެ.
މި ސަރުކާރުން ސުޕަރ މެޖޯރިޓީގެ ބޭނުން ނަހަމަ ގޮތުގައި ނުހިފާނެކަމުގެ ޔަގީންކަން ދެއްވައި ހީނާ އިތުރަށް ވިދާޅުވީ ސަރުކާރުގެ އަމާޒަކީ ރައްޔިތުންގެ އާމްދަނީ އިތުރުކޮށް، އިގުތިސާދީ ގޮތުން ދެމެހެއްޓެނިވި ގޮތެއްގައި މި ގައުމަށް ތަރައްގީ ގެނައުންކަމުގައެވެ.
One Response
އިންސާނީ ތަބީޢަތާ ހާދަ ދެކޮޅުގޮތަކަށް ތިޔަ ވިދާޅުވީ. ދެން މަމެން ބަލަން ތިބޭނީ. އިބޫވެސް ސަރުކާރު ފެށުނުތަނާ ކިހާ ޗަރުކޭސް އެއް ޖެއްސިތޯއެވެ. ރައްޔަތުންނާ ގާތުން ރައްޔަތުންގެ އަޑު އަހައިގެން ސަރުކާރު ހިންގަން ފޯރަމްތައްވެސް 4 މަސްވަންދެން ބޭއްވި. ޒީރޯ ޓޮލެރެންސް އިޢުލާނުކުރި. ޢަލީވަހީދު އަންހެންކުދިންނާއި ގާތްގޯޅިވީވަރުން ކީރިތިފުޅު ކުރެއްވުނު. ދެން މިހެންގޮސް އެތަކެއް އެތަކެއް ޝޯއެކެވެ. ނިމިދަޔައީ އިބޫގެ އެންމެ ގައި ދޯސްތުން އަދި ޚުދު މޑޕ ގެ ބޮޑުންވެސް އިބޫ ޗޯރު އިބޫ ޗޯރު ގޮވަމުން ބޯ ބުރާންތި އަރައިގެން އުޅުނުތަން. ޅިޔަނު އަންނިބެވެސް އިބޫ ޗޯރު ކިޔެންވާނޭ ގޮވާ މަޖިލިސްތެރޭގައިވެސް ނަށިތަން. ދެން ނިމުނީ ބޮލާފޮށާ އެޅިގެން. މިހެން ވާނެޔެކޭނޫނެވެ. ވެދާނެއޭ މިދެންނެވީ…… ދެން މިތިބީބަލާށެވެ. އުންމީދަކީ ވިދާޅުވާ ގޮތަށް ކަންކަންވެ ނަތީޖާފެނި ރާއްޖޭގެ ދަރަނި ދަށަށްދިއުމެވެ. ރައްޔަރުމީހާ ސަލާމް ނުޖަހާ ހަމަޖެހިލައިގެން ދިރިއުޅުމެވެ.
ޝުކުރިއްޔާ ރައީސް!