2008 ވަނަ އަހަރު ދިވެހިރާއްޖޭގައި ތަޞްދީޤު ކުރެވުނު ފެހި ޤާނޫނު އަސާސީގެ ދަށުން 04 ދައުރެއްގައި ދިވެހިރާއްޖޭގައި 04 ބޭފުޅަކު ވެރިކަން ކޮށްފިއެވެ. ދިވެހިރާއްޖޭގެ ދަރަނި 120 ބިލިއަން ރުފިޔާ އަށް އަރައިފިއެވެ. ޖީޑީޕީ ނިސްބަތުން މި ދަރަންޏަކީ ދިވެހިރާއްޖެ ފަދަ ޤުދުރަތީ ރިސޯސްތަކެއް ނެތް ޤައުމަކަށް ވަރަށް ބޮޑު ބުރައެކެވެ. މި ސިޓީގައި މައިގަނޑު ގޮތެއްގައި ދެތިން ކަމެއް ފާހަގަ ކޮށްލަން ބޭނުމެވެ.

ޤާނޫނު އަސާސީގެ މައްދާތަކަކީ މުޅި މަޖިލިސްގެ ވަރަށް ބޮޑު އަޣުލަބިއްޔަތެއް ލިބިގެންނޫނީ ބަދަލު ނުކުރެވޭނެފަދަ އެއްޗަކަށް ހައްދަވައި ދެއްވުމަކީވެސް އެދޭ ކަމެކެވެ. އެހެނީ އަންނަ ކޮންމެ ވެރިއަކު ބޭނުންވާހާ ގޮތަކަށް ބަދަލު ކުރެވޭ އެއްޗަކަށް ޤާނޫނު އަސާސީ ވެގެންނުވާނެ ކަމަށް އަޅުގަނޑަށް ފެންނާތީ އެކަން ހާމަ ކޮށްލީމެވެ. ދުނިޔޭގެ ކުރިއަރާފައިވާ ޤައުމުތަކުގައިވެސް އިރުއިރުކޮޅާ ޤާނޫނު އަސާސީއަކާ ނުކުޅެއެވެ.

ޓެކްސްގެ ޤާނޫނުގައި ރައީސްއަށް ވިޔަސް އެހެން ފަރާތަކަށްވެސް ދައުލަތަށް ދައްކަންޖެހޭ ޓެކްސް މާފު ނުކުރެވޭ ގޮތަށް ހެދުން.

އެހެނީ ބޮޑެތި ވިޔަފާރިވެރިން މިލިއަނުން ސަރުކާރަށް ދައްކަން ޖެހިފައިވާ ޓެކްސް ފައިސާ ރައިސް އިބްރާހީމް މުޙައްމަދު ޞާލިހުގެ ސަރުކާރުން ވަނީ މަޢާފު ކޮށްދީފައެވެ. މިކަމަކީ އަޅުގަނޑުމެން އާންމު ރައްޔިތުންނަށް ކޮށްފައިވާ މަލާމާތެކެވެ. އެހެނީ އަޅުގަނޑުމެންގެ އަތުން ޖީއެސްޓީ މައާފެއް ނުކުރެވެއެވެ. ތަކެތީގެ އަގު އެހާ ބޮޑެވެ. އިންފުލޭޝަން އަބަދުވެސް މިދަނީ ބޮޑުވަމުންނެވެ. ބުނެވޭ ގޮތުގައި ސްރީލަންކާ ޑީފޯލްޓަށް ދިއުމަށް މެދުވެރިވި އެއްސަބަބަކީ ބޮޑެތި މަހުޖަނުން ދައްކަންޖެހޭ ޓެކްސް މައާފު ކުރުމެވެ.

ޖޭ.އެސް.ސީ ޤާނޫނު އަސާސީން އުނިކުރައްވާފައި ކޯޓުތައް އެޑްމިނިސްޓަރ ކުރުމަށް އުއްތަމަ ފަނޑިޔާރުގެ ދަށުން އޮންނަ ގުނަވަނެއް އުފެއްދުން.

އަނެއްކާވެސް ދަންނަވަން ޖެހޭނީ ކުރިއަރާފައިވާ ޤައުމުތަކަށް ބަލާއިރު ޖޭ.އެސް.ސީ ކިޔާ ގުނަވަނެއް ނޯންނަ ކަމުގައެވެ. އަދި ފެހި ޤާނޫނު އަސާސީ އެކުލަވާލެއްވި ބޭފުޅުންވެސް ވިދާޅުވަނީ ޖޭ.އެސް.ސީ އަކީ އިންތިގާލީ އެއްޗެއްގެ ގޮތުގައި ހިމެނުނު ގުނަވަނެއް ކަމުގައެވެ.

އަޅުގަނޑުމެންނަކީ ކަނޑުގެ ޚަޒާނާ ލިބިފައިވާ ބަޔަކަށް ވީހިނދު އަޅުގަނޑުމަނަށް ކަނޑުގެ ރިސޯސްތައް ބޭނުން ކުރެވޭ ގޮތް ހެދުން މުހިންމު ކަމުގައި ދެކެމެވެ. އެންދެރިގަސްތައް ބޮޑެތިވެ ފީވެ ހަލާކު ވެގެންދާއިރުވެސް އެއިން ދިވެހީންނަށް މިހާރު ނަފާ ނުހޯދޭކަން ފާހަކުރެވެއެވެ. ދިވެހި މަސްކަނޑުގައި މިޔަރު ގިނަވެ ފަތުރުވެރިންނަށްވެސް އޭގެ ނުރައްކާވެފައިވާ ވަގުތެއްގައި ކަށިމިޔަރު ތެޔޮ ހަދައިގެން އެކްސްޕޯރޓް ކުރެވޭނެ މަގެއް ހޯދުމަކީވެސް ދިވެހި އިޤްތިޞޯދަށް ނުހަނު ފައިދާ ލިބޭނެ ކަމެއްކަމުގައި ދެކެމެވެ.
އަޅުގަނޑުމެންގެ މި ޤައުމު ސަލާމަތާއި އަމާންކަން މަތީގައި އަބަދުގެއަބަދަށް ލަހައްޓަވާށިއެވެ! އާމީން!