ގަތުލުއާންމު ހުއްޓުވުމަށްޓަކައި އިނގިރޭސިވިލާތުން އިޒްރޭލަށް ހަތިޔާރު ފޮނުވުން ހުއްޓާލުމަށް އެދި ލިޔެފައިވާ ސިޓީއެއްގައި އިނގިރޭސިވިލާތުގެ ގާބިލު ވަކީލުންގެ 600 ފަރާތަކުން ސޮއިކޮށްފިއެވެ.
ސުޕްރީމް ކޯޓުގެ ކުރީގެ ތިން ގާޒީންނާއި، އެ ކޯޓުގެ ކުރީގެ ރައީސާ ލޭޑީ ހޭލް ގެ އިތުރުން، އެކެޑެމިކުންނާއި، ރިޓަޔަރމެންޓްގައި ތިބި އިސް ގާޒީން ހިމެނޭ ގޮތަށް 600އަށްވުރެ ގިނަ ވަކީލުން ސޮއިކޮށް، ބޮޑުވަޒީރު ރިޝީ ސުނަކް އަށް ފޮނުވި މި ސިޓީގައި ބުނެފައިވަނީ އިޒްރޭލަށް ހަތިޔާރު ފޮނުވުމަކީ އިންގިރޭސިވިލާތުގެ ސަރުކާރުން ބައިނަލްއަޤްވާމީ ގާނޫނާ ޚިލާފަށް ކުރާ ކަމެއް ކަމަށެވެ. އަދި އިޒްރޭލުން ހަމަލާތައް ހުއްޓާލައި “ސީޒްފަޔަރ” އަކަށް ދިޔުމަށް ގޮވާލިނަމަވެސް ބައިނަލްއަޤްވާމީ ގާނޫނުގެ ދަށުން އެވަރުން ނުފުދޭކަމަށެވެ.
އިޒްރޭލުން ޣައްޒާއަށް ދެމުންގެންދާ ހަމަލާތަކަށް ވަނީ 6 މަސްވެފައެވެ. މި މުއްދަތުގައި ފަލަސްތީނުގެ އަންހެނުންނާއި ކުޑަކުދީން ހިމެނޭ ގޮތަށް އެތައް ހާސް ބަޔަކު ވަނީ ޝަހީދުކޮށްލާފައެވެ. އިނގިރޭސިވިލާތް ހިމެނޭވގޮތަށް މެދުއިރުމަތިން ބޭރުގެ ގިނަ ގައުމުތަކުން އިޒްރޭލާމެދު ނުރުހި، ހަނގުރާމަ ހުއްޓާލުމަށް ގޮވާލާފައިވަނީ އިންސާނީ އެހީތެރިކަން ފޯރުކޮށްދޭ ބައިނަލްއަޤްވާމީ 7 އެހީތެރިޔަކު ޝަހީދުކޮށްލައި މިދިޔަ ހަފްތާގެ ތެރޭގައި އިޒްރޭލުން ދިން ހަމަލާއަކަށްފަހުގައެވެ.
