އިސްރާއީލުން ދިމިޝްގުގައި ހުންނަ އީރާނުގެ ސަފީރު އޮފީހަށް ދިން ޙަމަލާގެ ބަދަލު އީރާނުން ހިފާނެކަންވަނީ އަންގާފައެވެ. އިސްރާއީލަށް ފިލާވަޅެއްދޭނެ ކަމަށްބުނެ އެފަދަ ޙަމަލާއެއް ދިނުމަށް އީރާނުން ތައްޔާރުވަމުންދާތާ ހަފްތާއެއްވީއެވެ.

އެމެރިކާގެ ޖާސޫސީ އިދާރާއިންވެސް މިއަދު ބުނެފައިވަނީ ކުރިއަށް އޮތް 24 ގަަޑިއެއްހާއިރުގެ ތެރޭގައި އީރާނުން އިސްރާޢީލަށް ހަމަލާ ދޭނުމުގެ ހުރިހާ ތައްޔާރީތަކެއް  ވެއްޖެކަމަށެވެ. އެޚަބަރާއި ގުޅިގެން  އެކަން ނުކުރުމަށާއި އިސްރާއީލު ދިފާއުކުރުމަށްޓަކައި އެމެރިކާއިން ނުކުރާނެ އެއްވެސް ކަމެއް ނޯންނާނެކަން ރައީސް ބައިޑަން އީރާނަށް އިންޒާރު ދީފިކަމަށް ދާދި ދެންމެއަކު އޭ ބީ ސީ ނިއުސް އިން ޚަބަރު ދީފިއެވެ.    

ކުރިން ހާމަކޮށްފައި ނުވާ ހަފުލާއަކުން ނިކުމެ ވަޑައިގެން ރައީސް ބައިޑްން ހިންގަވާފައި ވަޑައިގަންނަވަން ފެއްޓެވުމުން އޭ ބީ ސީގެ ވައިޓް ހައުސްއާއިބެހޭ ކޮރެސްޕޮންޑެންޓް ނިއުސް ޗީފް މޭރީ ބުރޫސް ފަހަތުންގޮސް އެމެރިކާއިން އީރާނަށް ޙަމަލާދޭނަންތޯ ތަކުރާރުކޮށް ސުވާލު ދެންނެވުމުން އެނބުރި ލެކްޓާރނަށް ވަޑައިގެން ވިދާޅުވީ “ އިސްރާއީލު ދިފާއުކުރުމަކީ އަހަރެމެންނަށް އަޅުކަމެއް ކަމަށާއި އިސްރާއީލު ދިފާޢު ކުރާނެ ކަމަށާއި އީރާނަށް ކާމިޔާބު ނުކުރެވޭނެ ކަމަށެވެ“.

ރައީސް ބައިޑަން މިހެން ވިދާޅުވި އިރު އެމެރިކާގެ ސިޔާސީ އިސް ބޭފުޅުންވެސް ގެންދަވަނީ އީރާނުގެ ޙަމަލާގެ ސަބަބުން މުޅި މެދު އިރުމަތީގައި ހަނގުރާމައެއް ފެށިދާނެތީ އިސްރާއީލަށް ޙަމަލާ ނުދިނުމަށް އީރާނަށް ބާރު އަޅުއްވަމުންނެވެ. ނަމަވެސް އިސްރާޢީލުން އެއްވެސް ދިމާލެއްގައި ހިންގާ ގަތުލު ޢާންމުތައް ނުހިންގުމަކަށް ބައިޑަން އަކަށް އިންޒާރެއް ނުވަތަ މޫނު ކުނިކޮށްފާ އެއްޗެއް ބުނެލާތަނެއް ދުނިޔެދެކެފަކާ ނެތެވެ.

އީރާނަށް އިންޒާރުދެމުން އެމެރިކާއިން ގެންދަނީ ސިފައިންނާއި އެހެނިހެން ވަސީލަތްތައް މެދުއިރުމައްޗަށް ޖަމާކުރަމުންނެވެ. އެމެރިކާއިން ބުނެފައިވާ ގޮތުގައި އިސްރާއީލަށް ޙަމަލާ ދިނުމަށްޓަކައި އީރާނުގެ ގިނަ އަދަދެއްގެ މިސްއިލް އާއި ޑްރޯން ވަނީ ތައްޔާރީ ޙާލަތަކަށް ގެނެސް ފައެވެ.

އެމެރިކާއިން ބުނެފައިވަނީ އެމެރިކާގެ ސިފައިންނާއި އެހެން ވަސީލަތްތައް ޖަމާކުރެވެނީ އެ ސަރަޙައްދުގައި ތިބި އެމެރިކާގެ ސިފައިންނާއި ވަސީލަތްތައް ރައްކާތެރި ކުރުމަށް ކަމަށެވެ. އެ ސަރަޙައްދަށް ޖަމާކުރެވޭ ވަސީލަތްތަކުގެ ތެރޭގައި މަނަވަރު ފަހަރާއި ހަނގުރާމަމަތި މަތިންދާ ބޯޓުފަހަރުވެސް ހިމެނެއެވެ.

އެމެރިކާ ކަނޑު ސިފައިންގެ 2 ޑެސްޓްރޯޔަރ މިހާރުވެސް އޮތީމެޑިޓެރޭނިއަން ކަނޑުގައެވެ. އެ އުޅަނދުފަހަރުގައި ބެލިސްޓިކް މިސައިލުން ދިފާއުގެ ނިޒާމާއި އޭޖީސް ކޮމްބެޓް ސިސްޓަމް ވެސް ހުރީ ގާއިމް ކޮށްފައެވެ. މިއީ ޔަމުނުގެ ހޫތީ މުޖާހިދުނެ ރެޑްސީއިން އިސްރާޢީލަށް ދަތުރުކުރާ އުޅަނދުފަހަރު ހުށްޓުވުން ހުށްޓުވަން ކޮށްފައިވާ ކަމެކެވެ. ނަމަވެސް މާބޮޑު ކާމިޔާބެއް މިއަދާހަމަޔަށްވެސް ވަނީ ނުލިބިފައެވެ. ހޫތީން ބިރުގަންނަކަމަށްވެސް ވަނީ ނުވެފައެވެ.

އިރާގާއި ސީރިޔާގައި އެކަނިވެސް އެމެރިކާގެ 3400 ސިފައި ތިބެއެވެ. މެދު އިރުމަތީގެ އެހެން ސަރަޙައްދުތަކުގައިވެސް އެތައް ހާސް އެމެރިކާ ސިފައިން ތިބީ ގާއިމް ކޮށްފައެވެ.

މިދިޔަ ހުކުރު ދުވަހު ރައީސް ބައިޑަން އެއަރފޯސް 1 އަށް އަރާވަޑައިގަންނަވަނިކޮށް އީރާނުން އެމެރިކާމީހުންނަށް ޙަމަލާދީ މަރާފާނެހެން ހީފުޅުކުރެއްވޭތޯ ދެންނެވުމުން ވިދާޅުވެފައިވަނީ “ އަހަރެން އަބަދުވެސް އެކަމާހުރެ ޖެހިލުންވާ “ ކަމަށެވެ.

ވައިޓް ހައުސްގެ ނޭޝަނަލް ސެކިއުރިޓީ އެޑްވައިޒަރ ޖޯން ކާރބީ ބުނެފައިވަނީ އެމެރިކާ ސަރުކާރުން މެދުއިރުމަތީގެ ޙާލަތު ވަރަށް ކައިރިން ބަލަމުން ގެންދާކަމަށާއި އެމެރިކާގެ ރައްޔިތުންނާއި އިސްރާއީލުގެ ރައްކާތެރިކަން ކަށަވަރުކުރުމަކީ އެމެރިކާގެ އެންމެ އިސް ވާޖިބު ކަމަށެވެ. އެހެންގައުމެއްގެ ސަލާމަތާއި ރައްކާތެރިކަމުގެ އެއްވެސް ވާހަކައެއް ބުނެފާނުވެއެވެ.

އެމެރިކާގެ އެމްބަސީއެއް ތެހެރާނުގައި ނެތުމާއިއެކު އެކުވެރި ބައެއްދައުލަތްތަކުގެ ނުފޫޒު ބޭނުންކޮށްގެންވެސް ޚަރިޖީ ވަޒީރު ބްލިންކަން ގެންދަވަނީ އީރާނުގެ ވިސްނުން ބަދަލުކުރެވޭތޯ މަސައްކަތް ކުރައްވަމުންނެވެ. ޚާރިޖިއްޔާގެ ތަރުޖަމާނު މެތިއު މިލަރ ބުނެފައިވަނީ ޚާރިޖީ ވަޒީރު އެންތަނީ ބްލިންކަން މިހާތަނަށް ޗައިނާއާއި ތުރުކީއާއި އަދި ސައޫދީ ޚާރިޖީ ވަޒީރަށް ދަންނަވާފައިވާކަމަށެވެ. ނަމަވެސް އީރާނުގެ ”ބޯހަރުކަމުން“ އެދެވޭ އެއްވެސް ނަތީޖާއެއް ލިބިފައި ނުވާކަމަށެވެ.