އިންޓެލިޖެންސް އޮޕަރެޓިވްސް އާއި، އަސްކަރީ ތަމްރީނު ލިބިފައިވާ ސިފައިންނާއި، ކުށްވެރިންގެ ގޭންގުތަކުގެ އެހީއާއެކު މެދުއިރުމަތީގައި ސިއްރު ސްމަގްލިންގް ރޫޓެއް ގާއިމުކޮށް، އެ މަގު ބޭނުންކޮށްގެން ފަލަސްތީނަށް އެހީތެރިވުމަށްޓަކައި އިރާނުން ވެސްޓް ބޭންކަށް ހަތިޔާރު އެތެރެކޮށްދެމުން ދާކަމަށް އެމެރިކާއާއި، އިޒްރޭލާއި، އިރާނުން ހާމަކޮށްފިއެވެ. 

އިރާނުގެ ތިން އޮފިޝަލަކު ބުނެފައިވާ ގޮތުގައި، އިރާނުގެ ބޭނުމަކަށްވަނީ އިޒްރޭލާއި ދެކޮޅްށް ބޭނުންކުރުމަށް ފަލަސްތީނުގެ ރައްޔިތުންނަށް ހަތިޔާރު ފޯރުކޮށްދީ، އެ ސަރަހައްދު ފުރާލުމެވެ. 

އިޒްރޭލުން ޣައްޒާގައި ހިންގާ ގަތުލުއާންމު ނިމުމަކަށް އައިސް އާންމު ދިރިއުޅުމަށް ރުޖޫޢަވެވޭނެ ދުވަހެއްގެ ހުވަފެން ގިނަ މުސްލިމް ގައުމުތަކުން ދެކޭއިރު، އިޒްރޭލުން ކުރާ ހަނގުރާމައިގައި އިޒްރޭލުގެ ނިރުބަވެރި ސިފައިންނާއި ކުރިމަތިލުމަށް ފަލަސްތީނަށް ބޭނުންވާނެ ހަތިޔާރު ފޯރުކޮށްދިނުމުގެ އަމަލީ މަސައްކަތް ކުރަނީ އިރާނުން އެކަންޏެވެ.