އިންޑޮނޭޝިއާގެ އަންޓްރަޕްރަނޯރެއް ކަމަށްވާ ޕުޓްރާ ކެލާނާ ކޮންމެ ރަމަޟާން މަހެއްގައިވެސް އާދައިގެ މަތީން އެކި ރެސްޓޯރެންޓްތަކާއި ކާބޯތަކެތި ވިއްކާ ފްރެންޗައިސް ތަކަށް ރޯދަ ވީއްލުމަށް ޒިޔާރާތްކުރި ނަމަވެސް، މިފަހަރު ނުދާނެ ތަނެއް އެބައޮތްކަމަށް އޭނާ ބުނެއެވެ. މެކްޑޮނަލްޑްސް އެވެ.

އިޒްރޭލުން ޣައްޒާގައި ހިންގަމުން ގެންދާ ގަތުލު އާންމާއެކު ގިނަ ގައުމުތަކުގެ ރައްޔިތުން ގެންދަނީ އެބގައުމަށް އެތެރެކުރާ އިޒްރޭލުގެ މަސްލަހަތު އޮންނަ މުދާ ބޭނުންނުކޮށް ބޮއިކޮޓް ކުރަމުންނެވެ. އަދި އިޒްރޭލުގެ މަސްލަހަތު އޮންނަ ކުންފުނިތަކުގެ ޚިދުމަތްވެސް ބޮއިކޮޓްކުރަމުންނެވެ.

މިގޮތުން، ކެލާނާ ބުނި ގޮތުގައި މެކްޑޮނަލްޑްސް-އިޒްރޭލުން މިދިޔަ އޮކްޓޯބަރު މަހުގެ ތެރޭގައި އިޒްރޭލުގެ ސިފައިންނަށް އެތައް ހާސް މީލް ހަދިޔާކުރިފަހުން އޭނާ ގެންދަނީ މެކްޑޮނަލްޑްސް ބޮއިކޮޓްކުރަމުންނެވެ.

“އިޒްރޭލުން ކުރާ ހަނގުރާމައިގައި އަހަރެންނަށް ޣައްޒާ ދިފާޢުކުރަން ހަނގުރާމަކުރުމުގެ ފުރުސަތު އޮތްނަމަ އަހަރެން އެތަނަށް ގޮސް ހަނގުރާމަކުރީސް. އެކަމަކު، އެކަން ކުރެވެން ނެތް ހާލު ދެން ކުރެވެން އޮތް އެންމެ ބޮޑުކަމަކީ އިޒްރޭލުގެ އަދި އިޒްރޭލުގެ މަސްލަހަތު އޮންނަ މުދާ ބޭނުންނުކޮށް ޣައްޒާއަށް އެއްބާރުލުން ދިނުން.” ކެލާނާ ބުންޏެވެ.

ޣައްޒާގެ ހަނގުރާމަ ފެށުނުފަހުން މެކްޑޮނަލްޑްސް ގެ ވިޔަފާރި ދަށަށް ގޮސްފައިވާއިރު، ދުނިޔޭގެ ބާޒާރުގައިވެސް ކުންފުނީގެ އަގުވަނީ ވެއްޓިފައެވެ. އެގޮތުން، 2022 ވަނަ އަހަރުގެ ފަހު ކުއާޓަރުތެރޭގައި މެކްޑޮނަލްޑްސްގެ ވިޔަފާރި 16.5 އިންސައްތަ މައްޗަށް ޖެހުނުނަމަވެސް، މިދިޔަ އަހަރުގެ އެމުއްދަތުގެ ތެރޭގައި ލިބިފައިވަނީ 0.7 އިންސައްތައިގެ ކުރިއެރުމެކެވެ.

މެކްޑޮނަލްޑްސްގެ ސީއީއޯ ކްރިސް ކެމްޕެންޒެންސްކީ ބުނެފައިވާގޮތުގައި، އެންމެ ބޮޑު ބަދަލެއް ފެނިފައިވަނީ މެދު އިރުމަތީގެ ގައުމުތަކާއި އިންޑޮނޭޝިއާއާއި މެލޭޝިއާ ފަދަ މުސްލިމް ގަުއުމުތަކުންނެވެ.

“ހަނގުރާމަ ކުރިއަށް ދާހާ ދުވަހަކުވެސް މިއަށް ބަދަލެއް އަންނާނެހެނެއް ހިއެއް ނުވޭ.” ކެމްޕެންޒެންސްކީ ބުންޏެވެ. 

މި ބޮއިކޮޓްގެ ސަބަބުން އަސަރުކޮށްފައިވާ އެހެން ބައެއް ބްރޭންޑްތަކަކީ ޔުނިލީވާރ އާއި ސްޓާބަކްސްއެވެ.