ވިލިމާލޭގައި ތަރައްޤީކުރާ 100 އެނދުގެ ޓާޝަރީ ހޮސްޕިޓަލުގެ މަސައްކަތް މިހާރު ފަށާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ”ރައީސްގެ ޖަވާބު“ ޕްރޮގްރާމްގައި ވިލިމާލޭ ހޮސްޕިޓަލުގެ ސިއްހީ ޚިދުމަތް ރަނގަޅު ކޮށްދެއްވުމާ ގުޅޭ ގޮތުން މާލެ ސިޓީ ވ. ފަޒީލާ މަންޒިލް، އަހްމަދު ޝިފާން ކުރެއްވި ސުވާލަކަށް ޖަވާބުދެއްވަމުންނެވެ.
އެގޮތުން ރައީސް މިއަދު ވިދާޅުވީ ވިލިމާލެއިން ފޯރުކޮށްދޭ ސިއްހީ ހިދުމަތްތައްތަކުގެ ފެންވަރު ރަނގަޅު ކުރުމަކީ ސަރުކާރުން ވަރަށް ބޮޑު އިސްކަމެއް ދެއްވާ ސިޔާސަތެއް ކަމަށާއި މި ސަރުކާރުން ވިލިމާލޭގެ ސިއްހީ ޚިދުމަތްތަކަށް ދިމާވެފައިވާ މައްސަލަ ހައްލު ކުރާނެ ކަމަށެވެ.
”ވިލިމާލޭގައި އަޅުގަނޑު އިއުލާންކޮށްފަވާނެ 100 އެނދުގެ ޓާޝަރީ ހޮސްޕިޓަލެއް އަޅާނެ ވާހަކަ. އެހެންވީމާ އެ މަސައްކަތް މިހާރު އެބަހިނގާ“ ރައީސް ވިދާޅުވިއެވެ.
އަދި އެ މަސައްކަތް ކުރިއަށްގެންދަން ނިންމާފައި ވަނީ ޗައިނާގެ ހިލޭ އެހީގެ ދަށުން ކަމަށާއި މިހާރު ކުރިއަށްދަނީ ޗައިނާގެ ކަމާބެހޭ އިދާރާގެ ބޭފުޅުންނާއި ކޮންސްޓްރަކްޝަން މިނިސްޓްރީއާ ހެލްތު މިނިސްޓްރީއާ ގުޅިގެން ޓެކްނިކަލް މަސައްކަތްތަކާއި ޑިޒައިނިންގ މަސައްކަތްތައް ކަމަށް ރައީސް ވިދާޅުވިއެވެ.
ހަމަ އެހެންމެ އެކަމަށް ބިން ވެސް ކަނޑައަޅާފައިވާ ކަމަށް ރައީސް ވިދާޅުވިއެވެ.
އެހެން ކަމުން ޑިޒައިނިން އަދި ޓެކްނިކަލް މަސައްކަތް ނިމުމުން، ހޮސްޕިޓަލް ހެދުމުގެ އަމަލީ މަސައްކަތް ފެށިގެންދާނެ ކަމަށް ރައީސް ވިދާޅުވިއެވެ.
މީގެ އިތުރުން ވިލިމާލޭގެ ރައްޔިތުންނަށް، ހިތްހަމަޖެހޭވަރުގެ 100 އެނދުގެ ޓާޝަރީ ހޮސްޕިޓަލު ވަރަށް އަވަހަށް ލިބިގެންދާނެ ކަމުގެ ޔަގީންކަން ރައީސް ވަނީ ދެއްވާފައެވެ.
