މަކަރާއި ހީލަތުން ޖަމުޢިއްޔާއެއްގެ އެކައުންޓުން 5 ލައްކައަށްވުރެ ގިނަ ރުފިޔާ ނަގައި, އެ ފައިސާ 40 ފަރާތެއްގެ އެކައުންޓަށް ޖަމާކޮށްފައިވާ ކަމަށް ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތު މިއަދު ވިދާޅުވެއްޖެއެވެ.
ލޫތު މިހެން ވިދާޅުވީ ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި މަޢުލޫމާތު ހިއްސާކުރައްވަމުންނެވެ.
އޭނާ ވިދާޅުވީ ޖަމުޢިއްޔާއެއްގެ އެކައުންޓުން 5 ލައްކައަށް ވުރެ ގިނަ ރުފިޔާ މަކަރާއި ހީލަތުން އަތުލާފައިވާ މައްސަލައިގެ ތަހުގީގަށް އެނގިފައިވާ ގޮތުގައި އެ ފައިސާ 40 ފަރާތެއްގެ އެކައުންޓަށް ޖަމާކޮށްފައިވާ ކަމަށެވެ.
މި މައްސަލައިގައި ފައިސާ ހޯދުމަށް ފޯނުކޯލު ކޮށްފައިވަނީ މާފުށީ ޖަލުން ކަމަށާއި މި މައްސަލައާއި ގުޅިގެން މާފުށީ ޖަލު ބަލައި ފާސްކޮށް ގިނަ ޢަދަދެއްގެ ތަކެތި ހޯދާފައިވާކަމަށް ވެސް އޭނާ ވިދާޅުވިއެވެ.
އޭގެތެރޭގައި 22 އަށް ވުރެ ގިނަ ސްމާޓް ފޯނާއި، ސިމް ކާޑުތަކާއި، ސްޓޯރޭޖު ޑިވައިސްތަކާއި، ބެޓްރިއާއި، ޕަވަރބޭންކާއި ހެޑުސެޓުފަދަ އާލާތްތައް ހިމެނެއެވެ.
މާރިޗު 6 ވަނަ ދުވަހު މާފުށި ޖަލުގައި ހިންގި އޮޕަރޭޝަނެއްގައި ވެސް ބައެއް ގޮޅިތައް ބަލައި ފާސްކޮށް 22 މޯބައިލް ފޯނު، 10 ޗާޖަރު، 10 ހެޑްސެޓް/އެއާޕޮޑް، ދެ ސިމްކާޑު އަދި މޯބައިލް ފޯނުގެ ބައިތަކެއް ހޯދައި ފުލުހުންގެ ބެލުމުގެ ދަށަށް ގެންގޮސްފައިވެއެވެ.
