އެސޯޝިއޭޓެޑް ޕްރެސް އިން ރިޕޯޓް ކޮށްފައިވާ ގޮތުގައި ހަތިޔާރު ހުސްވެގެން ސަލާންޖަހަނިކޮށްގެން ލިބުނު ފައިސާކޮޅުގެ ތެރެއިން 40 މިލިއަން ޑޮލަރ ހަތިޔާރު ގަނެދޭ އޭޖެންޓާއި ދިފާއީ ވުޒާރާގް އޮފިޝަލުން ގުޅިގެން ޖީބަށް ކަޅާކޮށްލައިފިއެވެ.

ކަޅާކުރުމަކީ މަޖާޒީ ބަހެކެވެ. މާނައަކީ ބައްކުރުމެވެ.

އެއީ އެއްލައްކަ މޯޓަރ ޝެލް ގަތުމަށް ހޯދި ފައިސާ ކޮޅެކެވެ. ޔޫކްރެއިންގެ ސެކިއުރިޓީ ސަރވިސް އެސް. ބީ. ޔޫ. އިން ހާމަކޮށްފައިވާ ގޮތުގައި މި މައްސަލާގައި މިހާތަނަށް ފަސް މީހަކު ވަނީ ހައްޔަރު ކޮށްފައެވެ.

އޭގެތެރެއިން އެކަކު އަތުލާގެންފައިވަނީ ޔޫކްރެއިންގެ ބޯޑަރ ހުރަސްކުރަން އުޅެނިކޮށެވެ. އެމީހުންގެ ކުށް ސާބިތު ކުރެވިއްޖެނަމަ 12 އަހަރުގެ ޖަލު ހުކުމެއް އަންނާނެއެވެ.

މި ދުވަސްވަރަކީ ޔޫކްރެއިނުން ޔޫރަޕިއަން ޔޫނިއަން އަދި ނޭޓޯގެ މެމްބަރަކަށް ވުމަށް ފައިނަގަމުންދާ ދުވަސް ވަރަކަށްވެފައި އެ ދެ ޖަމާއަތުންވެސް ޔޫކްރެއިން ސަރުކާރުގެތެރޭގައި ވަކި ހިއްޕާލާފައިވާ ކޮރަޕްޝަން ނައްތާލުމުންނޫނީ މެމްބަރުކަން ދިނުމަށް ޝަރުތު ފުރިހަމަ ނުވާނެކަން އަންގަމުންގެންދާ ދުވަސްވަރެކެވެ.       

ޔޫކްރެއިންގެ ތެރޭގައި މުގޫ ލާފައިހުރި ކޮރަޕްޝަންގެ ބަލިމަޑުކަން ނައްތާލުމަށްޓަކައި ރަޝިޔާއިން ޔޫކްރެއިނަށް އަރާގަތުމުގެ ކުރިން 2019 އަހަރުއްސުރެން ރައީސް ޒެލެންސްކީ ގެންދަވަނީ އެންޓި ކޮރަޕްޝަން ކޮމިޝަނެއް އުފައްދަވައިގެން އެކަން ހުއްޓުވަން މަސައްކަތް ކުރައްވަމުންނެވެ. ރައީސް ޒެލެންސްކީއާއި ސަރުކާރުގައި ތިއްބެވި އެމަނިކުފާނަށް ވަފާތެރި ބޭފުޅުންގެ ކުރިމަތީގައި ކޮރަޕްޝަންގެ މައްސަލާގައި އިސްތިސްނާއެއް ނޯވެއެވެ. ދާދި މިދާކަށްދުވަހު ޔޫކްރެއިންގެ ސެކިއުރިޓީ ސަރވިސްގެ އެންމެ އިސްކޮށްހުންނެވި އިވާން ބަކާނޯވް ވެސް ވަނީ ކޮރަޕްޝަންގެ ތުހުމަތުގައި މަގާމުން ދުރުކޮށްފައެވެ.

ސެކިއުރިޓީ އޮފިޝަލުން ހާމަކޮށްފައިވާގޮތުގައި މިއީ މިހާރުގެ ދިފާޢީ ވަޒީރު މަގާމާއި ހަވާލުވެ ވަޑާއިގަތުމުގެ ކުރިން  2022 ވަނަ އަހަރު އޯގަސްޓް މަހުގެތެރޭގައި އެލްވައިވް އާސެނަލް މެދުވެރިކޮށް ހަތިޔާރު ގަތުމަށް ދީފައިވާ 39.6 މިލިއަން އެމެރިކާ ޑޮލަރަށް ޚިޔާނާތްތެރިވި މައްސަލާގެ ބައެކެވެ. އެ ކުންފުންޏާއެކު ވެފައިވާ އެއްބަސްވުމުގެ ދަށުން އެކުންފުންޏަށް ފައިސާލިބުމުން ބޭރުގައުމެއްގައި ހުރި އެ ކުންފުނީގެ އޭޖެންޓުން ހަތިޔާރު ޔޫކްރެއިނަށް ފޯރުކޮށްދޭން ޖެހޭނެއެވެ.

ފަހުން ތަހްގީގަށް ހާމަވެފައިވާ ގޮތުގައި އެއްބަސްވުމުގައި ބުނެފައިވާ ކުންފުންޏަށް އެފައިސާ ފޮނުވުމުގެ ބަދަލުގައި ފައިސާޖަމާކޮށްފައިހުރީ ޔޫކްރެއިނާއި އަދި ބޯލްކަންގެ އެކައުންޓް ތަކަކަށެވެ. މިހާރު އެ ފައިސާ ފޮނުވި ފަރާތްތައް ވަނީ ހޯދިފައެވެ. އަދި އެފައިސާ ޔޫކްރެއިންގެ ދިފާއީ ވުޒާރާއަށް ޖަމާކުރުމުގެ މަސައްކަތް ދަނީ ކުރެވެމުންނެވެ.

ޔޫކްރެއިންގެ އިސް ބޭފުޅުންގެ ތެރޭގައި ކޮރަޕްޝަނާއި އަމިއްލަ އެދުން މިފެންވަރަށް އަށަގެންފައިވާއިރު ބޭރުން ކިތަންމެ އެހީތެރިކަމެއް ފޯރުކޮށްދެމުން ގެންދިޔަ ނަމަވެސް ހަނގުރާމައިގާ ކާމިޔާބާ ހަމަޔަށް ދެވޭނީ ކިހިނެއް ހެއްޔެވެ؟

މި މައުޟޫއުގައި ވާހަކަ ދައްކަވަމުން ނޭޓޯގެ ކުރީގެ ސުޕްރީމް ކޮމާންޑަރ އެޑްމިރަލް ޖޭމްސް ސްޓާވްރިޑިސް ވިދާޅުވެފައިވަނީ ޔޫކްރެއިންގެ ހަނގުރާމަވެސް އެންމެފަހުން ނިމިގެންދާނީ ކޮރެޔާ ހަނގުރާމަ ނިމުނު ގޮތަށެވެ.  ރަޝިޔާއާއި ޔޫކްރެއިންވެސް މިހާރު އެތިބީ ވަރުބަލިވެފައެވެ. ދެން އިތުރަށް ކުރެވޭނެ މާބޮޑު ހަނގުރާމައެއް ނޯންނާނެއެވެ. ނަތީޖާއަކަށް ވެގެންދާނީ ސުލްހައިގެ އެއްބަސްވުމެއް ގާއިމް ކުރެވިގެން ދިއުމެވެ. ރަޝިޔާގެ ބާރުގެ ދަށުގައި ހުރި ސަރަހައްދުތައް ރަޝިޔާއަށް ލިބިދީގެންނެވެ.