އިރާނުން ނޫރް-3 ގެ ސެޓެލައިޓްތައް ކާމިޔާބުކަމާއެކު ޖައްވުގެ ތެރެއަށް ފޮނުވާއިފިއެވެ.
މި ސެޓެލައިޓްތައް ފޮނުވާލާފައިވަނީ 450 ކިލޯ މީޓަރުގެ އޯބިޓަކަށް (280 މޭލުގެ ދުރުމިނަކަށް) މިދިޔަ އާދީއްތަ ދުވަހުގައެވެ. ބޮޑު ސެޓެލައިޓް، މަހްދާގެ ބަރުދަނުގައި 32 ކިލޯ (71 ޕައުންޑް) ހުރިއިރު، ދެން ފޮނުވާލެވުނު ދެ ނެނޯ ސެޓެލައިޓުކަމުގައިވާ ކައިޙާން-2 އަދި ހާތިފް-1 ގެ ބަރުދަނުގައި 10 ކިލޯ ހަމަނުވާނެއެވެ. މި ތިނެތިވެސް ޖައްވަށް ފޮނުވާލާފައިވަނީ ސައިމޯގް (ފީނިކްސް) ސެޓެލައިޓް ކެރިއަރ މެދުވެރިކޮށެވެ.
އިރާނުގެ ކޮމިއުނިކޭޝަން އެންޑް އިންފޮމޭޝަން ޓެކްނޮލޮޖީގެ ވަޒީރު އިއްސާ ޒަރޭޕޯ ވަނީ ސެޓެލައިޓްތައް ކާމިޔާބުކަމާއެއް ޖައްވަށް ފޮނުވާލާފައިވާކަން ހާމަކޮށްފައެވެ.
އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އަމިއްލަ އުފެއްދުމެއްގެ އެހީގައި ކާމިޔާބު އޮޕަރޭޝަނެއް ހިންގާފައިވާކަމަށްބުނެ ޒަރޭޕޯ ވަނީ އެގައުމުގެ ޖައްވާބެހޭ މުއައްސަސާތަކާއި، މާޙިރުންނާއި، އައިއާރްޖީސީގެ އެއަރޯސްޕޭސް ފޯސްގެ ސިފައިންނަށް މަރުހަބާކިޔާފައެވެ.
މާރޗް 2022 ގައި ޖައްވަށް ފޮނުވާލި ނޫރް-2 ގެ މިސައިލުތައް ފޮނުވުމަށްވެސް އައިއާރްޖީސީއިން ބޭނުންކޮށްފައިވަނީ އެމީހުންގެ ޤަސަދް ލޯންޗް އުޅަނދެވެ. ނޫރް-2 ފޮނުވާފައިވަނީ 500 ކިލޯމީޓަރު (311 މޭލު) ގެ ދުރުމިނުގެ އޯބިޓަކަށެވެ. އަދި ނޫރް-1 ލޯންޗުކޮށްފައިވަނީ 2020 ވަނަ އަހަރުގައެވެ.
އައިއާރްޖީސީގެ ޣާއިމް 100 ސެޓެލައިޓް ކެރިއަރު މިދިޔަ ނޮވެމްބަރު މަހު ޓެސްޓުކުރިއިރު، އޭގެ ހަތަރު މަސްދުވަސްކުރިން އެގައުމުންވަނީ ”ޒުލްޖަނާ“ގެ ނަމުގައި ސެޓެލައިޓް ކެރިއަރެއްވެސް ލޯންޗުކޯށްފައެވެ.
