އިޒްރޭލުން ޣައްޒާގައި ހާސިލްކުރަން ބޭނުންވި ކަންކަން ހާސިލްނުކުރެވުމުން އިޒްރޭލުގެ ނިރުބަވެރި ސިފައިން ބައިބަޔަށް ޣައްޒާއިން ފައިބަން ފަށައިފިއެވެ.

އިޒްރޭލުން ބުނެފައިވަނީ ”ދެން އޮތް ފިޔަވަހީގެ ހަރަކާތްތައް ފެށުމަށްޓަކައި“، ޣައްޒާގައި ތިބި އިޒްރޭލު ސިފައިންގެ އަދަދު މަދުކުރަން އެގައުމުން ވާނީ ފަށާފައެވެ. 

މިގޮތުން، އިޒްރޭލު ސިފައިންގެ ރިޒާވް ޑިވިޝަން އެއްކޮށް ޣައްޒާ ސްޓްރިޕް ދޫކޮށް މިހާރު ގޮސްފައިވާއިރު، 551 ރިޒާވް ޕެރެޝޫޓް ކޮމާންޑޯ ބްރިގޭޑްއާއި އާމާރޑް ރިޒާވް ބްރިގޭޑްގެ 14 ވަނަ ބްރިގޭޑްވެސް ވަރަށް އަވަހަށް ޣައްޒާ ދޫކޮށް ދާނެއެވެ. 

ޣައްޒާގައި ހިންގާ އަސްކަރީ ހަރަކާތްތައް ފުރިހަމަކޮށް ނިމުމަކަށް ގެނައުމަށް އެމެރިކާގެ ރައީސް ޖޯ ބައިޑަން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް މުއްދަތު ދީފައިވަނީ މިދިޔަ އަހަރުގެ ނިޔަލަށް ކަމަށްބުނެ މީގެ މަހެއްހައި ދުވަސްކުރިން ބޮޑެތި ނޫސްތަކުން ރިޕޯޓުކޮށްފައިވާއިރު، ގިނަ ދުވަސްތަކެއްގެ މައްޗަށް ދެމިގެންދާނެ ހަނގުރާމައަކަށް ފަންޑުކުރުމުގެ ހިތްވަރާއި، ހަކަތައާއި، ފައިސާ އެމެރިކާގެ ކިބައިގައި ނެތެވެ. އަދި އިޒްރޭލުން މިހާރެ ވެއްޓިފައި އޮތް މާލީ އަދި އިޤްތިޞާދީ އަނދަވަޅުން ސަލާމަތްކުރަން ޖެހިފައި އޮތީވެސް ހަމަ އެމެރިކާއަށެވެ.

މީގެ އިތުރުން، ހިޒްބުﷲ އާއިއެކުގައި އޮތް ހަނގުރާމަ ދަނީ އިތުރަށް ހޫނުވަމުންނެވެ. މާހިރުން ގަބޫލުކުރާގޮތުގައި، މިގޮތަށް ސިފައިން އަނބުރައި ގެންދިޔުމަކީ ހަނގުރާމަ ހުއްޓާލުމުގެ މަޝްވަރާތައް ފެށުމަށްޓަކައި ހުޅުވާލެވޭ ދޮރެއްކަމަށެވެ.

ފަރުދާގެ ފުރަގަހުގައި ކޮންމެވެސް އެއްބަސްވުމަކަށް އައިސްފައިވުމަކީ އެކަށީގެންވާކަމެކެވެ. ނަމަވެސް ސީދާ އިޒްރޭލުން ބަލިވީކަން ނުއެންގުމަށްޓަކައި، އިޒްރޭލު ސިފައިން ޣައްޒާއިން ބާލާނީ މަޑުމަޑުންކަމަށް ކަމާއިބެހޭ ފަރާތްތަކުން ގަބޫލުކުރެއެވެ.