ސަރުކާރުގެ ކެބިނެޓަށް އައްޔަން ކުރެއްވި ހުރިހާ ވަޒީރުންނަށް ރުހުން ދިނުމަށް ފެންނަ ކަމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާާ މިންވަރު ބަލާ ކޮމިޓީއިން މިއަދު ފާސްކޮށްފިއެވެ.
ރައީސުލްޖުމްހޫރިއްޔާ ވަޒީރުންގެ މަޖިލީހަށް އައްޔަން ކުރެއްވި 22 ވަޒީރުންނަށް ރުހުން ހޯދުމަށް ރައްޔިތުންގެ މަޖިލީހަށް ފޮނުއްވީ ނޮވެމްބަރު މަހުގެ 19 ވަނަ ދުވަހުއެވެ. އެގޮތުން އެ މައްސަލަ ދިރާސާކުރުމަށްފަހު ވަޒީރުންގެ ޝަރުތު ހަމަވާކަމަށް ނިންމައި މަޖިލީހުގެ ތަޅުމަށް ފޮނުވިއެވެ.
ނަމަވެސް މިނިސްޓްރީތަކުގެ މަސައްކަތުގެ ދާއިރާތައް ފާސްނުކުރާ ކަމަށާއި ކޮމިޓީ ރިޕޯޓުގައި މައްސަލަތަކެއް ހުރިކަމަށް ވިދާޅުވެ އެމްޑީޕީ މެންބަރުން ނިޒާމީ ނުކުތާ ނެންގެވުމުން ރިޔާސަތުން އެކަން ބަލައިގަނެ މައްސަލަ އަނބުރާ ކޮމިޓީއަށް ފޮނުވައިލީ މި މަހުގެ 18 ގައެވެ.
ކޮމިޓީން މިއަދު ބޭއްވި ބައްދަލުވުމުގައި 22 ވަޒީރުންނަށް ރުހުންދޭން ފެންނަ ކަމަށް ފަސް މެންބަރަކު ވޯޓު ދެއްވިއެވެ. ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.
ނަމަވެސް ވަކި ގޮތަކަށް ވޯޓު ދެއްވަން ބޭނުންނުވާ ހަތަރު މެންބަރަކު ތިއްބެވިއެވެ.
