ސަރަހައްދީ ހަމަނުޖެހުން ބޮޑުވަމުންދާ މި ދަނޑިވަޅުގައި ގައުމުގެ ސިޔަާދަތު ދެމެހެއްޓުމަށްޓަކައި ކަމަށް ބުނެ އިރާޤުގައި  ތިބި އެމެރިކާގެ އަސްކަރީ ސިފައިން އެގައުމުން ބޭރުކުރަން ނިންމާފައިވާކަމަށް އިރާޤުގެ ބޮޑުވަޒީރު އަލް ސޫދާނީ ހާމަކޮށްފިއެވެ.

“އެމެރިކާއާއި އެކުގައި ބާއްވާ ގުޅުމަށް ބަދަލު ގެނައުމުގެ މަސައްކަތް މިދަނީ ކުރަމުން. މި ސަރުކާރުން ގަސްތުކުރަނީ ބައިނަލްއަޤްވާމީ

ކޯލިޝަނުގެ ސިފައިން އިރާޤުގައި ތިބޭ ތިބުމަށް ނިމުމެއް ގެނައުމަށް.“ އިރާނުން ވާގިވެރިވާ މިލިޝިއާތަކުން އިރާޤުގައި ތިބި އެމެރިކާގެ އަސްކަރީ ސިފައިންނާއި ދެކޮޅަށް ކޮންމެ ދުވަހަކު ޑްރޯނާއި މިސައިލް ހަމަލާތައް ދެމުން ގެންދާއިރު، ބަދަލުގައި އެމެރިކާއިން ދިން ވައިގެ ހަމަލާތަކުގައި މިލިޝިއާ މުޖާހިދުންގެ 16 މީހަކު ވަނީ ޝަހީދުކޮށްލާފައެވެ. އިރާޤަކީ ސީރިއާއި އެކު ބޯޑަރު ހިއްސާކުރާ ގައުމެކެވެ.

އިރާޤުން ބުނީ، މިލިޝިއާގެ ހަމަލާތަކަކީ ޓެރަރިޒަމްގެ އަމަލުތަކެއްކަމަށާއި އެކަން ކުށްވެެރިކުރާ ކަމަށެވެ. އަދި އެމެރިކާއިން ދެމުންގެންދާ ހަމަލާތަކަކީ އިރާޤުގެ ސިޔާދަތަށް އަރައިގަތުން ކަމުގައި ގަބޫލުކުރާކަމަށް އިރާޤުގެ ސަރުކާރުން ބުނެއެވެ.

އައިސިސް ޖަމާޢަތާއި ދެކޮޅަށް އެކުލަވާލި ބައިނަލްއަޤްވާމީ ކޯލިޝަނުގެ ދަށުން އިރާޤުގައި ތިބި ބޭރުގެ ސިފައިންގެ އެންމެ ބޮޑުބައެއް ހިއްސާކުރަނީ  އެމެރިކާ ސިފައިންނެވެ. އައިސިސް ބަލިކުރުމަށްފަހުވެސް ބޭރުގެ ސިފައި އިރާޤުގައި މަޑުކޮށްފައިވަނީ ސްލީޕަރް ސެލްތައް  ނައްތާލައި، އައިސިސް ޖަމާއަތް އަލުން ހަރަކާތްތެރިވުމުން ދުރުކުރުމަށް އިރާޤުގެ ސިފައިންނަށް އެހީތެެިވެދިނުމަށެވެ.