ރައްޔިތުންގެ މަޖިލީހުގެ 13 މެންބަރަކު ސަރުކާރު ހިންގާ މައި ޕާޓީ ޕީއެންސީއަށް ސޮއިކުރައްވައިފިއެވެ.

ޕްރޮގްރެސިވް ކޮންގްރެސް ކޯލިޝަނުން ދަރުބާރުގޭގައި މިރޭ ބޭއްވި ޖަލްސާގައި 13 މެންބަރުންގެ ތެރެއިން 3 މެންބަރުން ފިޔަވައި ދެން ތިއްބެވި 10 މެންބަރުން ވަނީ އެ ކޯލިޝަނުގެ ލީޑަރު ރައީސް ޑރ.މުޙައްމަދު މުޢިއްޒާ މެމްބަރޝިޕް ފޯމު ހަވާލު ކުރައްވައިފައެވެ.

ދެން ގުޅިވަޑައިގެންނެވި ތިން މެންބަރުން މިވަގުތު ތިއްބެވީ ރާއްޖެއިން ބޭރުގައި ކަމުން ޖަލްސާއަށް ވަޑައިނުގެންނެވުނީއެވެ.

ޕީއެންސީއަށް ސޮއިކުރެއްވި މެންބަރުންގެ ތެރޭގައި ހިމެނެނީ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) އާއި ފޭދޫ ދާއިރާގެ މެންބަރު މުޙައްމަދު ނިހާދާއި އިސްދޫ ދާއިރާގެ މެންބަރު ޢަލީ ޙަމީދާއި ކަނޑިތީމު ދާއިރާގެ މެންބަރު ޢަބްދު ޝަހީމް ޢަބްދުލްޙަކީމާއި ކުރެންދޫ ދާއިރާގެ މެންބަރު ޢަބްދުލްޣަނީ މުޙައްމަދާއި ތޮއްޑޫ ދާއިރާގެ މެންބަރު ޙަސަން ޝިޔާން (ގިޓާ) އާއި މުލަކު ދާއިރާގެ މެންބަރު އިބްރާހިމް ނަޞީރު ނިލަންދޫ ދާއިރާގެ މެންބަރު ޢަބްދުލްމުޙްސިން ޙަމީދު (ޓޫފޯ) އާއި މާފަންނު ދެކުނު ދާއިރާގެ މެންބަރު އާދަމް ޢަލީއާއި ކޮމަންޑޫ ދާއިރާގެ މެންބަރު މުޙައްމަދު ރާޝިދު (ރާޑޯ) އާއި މަތިވެރި ދާއިރާގެ މެންބަރު ޙަސަން ޒަރީރާއި ގުރައިދޫ ދާއިރާގެ މެންބަރު އިބްރާހިމް ޝާޒާއި މައްޗަންގޮޅި ދެކުނު ދާއިރާގެ މެންބަރު އަޙްމަދު ހައިތަމެވެ.

ހައިތަމް ފިޔަވައި ދެން ތިއްބެވި 12 މެންބަރުންނަކީ މަޖިލީހުގައި މިހާރު ވެސް އެމްޑީޕީ ތަމްސީލު ކުރައްވަމުން ގެންދަވާ މެންބަރުންނެވެ. ހައިތަމަކީ ވެސް އެމްޑީޕީގެ ޓިކެޓުގައި ގޮނޑި ކާމިޔާބު ކުރެއްވި ބޭފުޅެކެވެ. ނަމަވެސް އޭނާ އެ ޕާޓީން ވަކިވެވަަޑައިގެންނެވިތާ ދުވަސްތަކެއް ވެއްޖެއެވެ.

މި 13 މެންބަރުން ޕީއެންސީއަށް ސޮއިކުރެއްވުމާއެކު މަޖިލީހުގައި ޕީއެންސީގެ މެންބަރުންގެ އަދަދު 17 އަށް އަރާނެއެވެ.