މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، މަސީން ދޭ އެންމެ ފަޚުރުވެރި ލަޤަބު ”ބޮޑު ރަސްގެފާނު ލަޤަބު“ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއަށް އަރުވައިފިއެވެ.
މިއީ މި ލަޤަބު އެރުވި ފުރަތަމަ ފަހަރެވެ. މި ލަޤަބު ރައީސުލްޖުމްހޫރިއްޔާއަށް އެރުވީ ރޭ ހޮޓެލް ޖެންގައި ކުރިއަށްދިޔަ ”އެމް.އެން.އޭ.ސީ.އައި ބިލްޑަރ އެވޯޑްސް 2023“ ޙަފުލާގައެވެ.
މި ލަޤަބު ރައީސްއަށް އަރުވާފައި ވަނީ ރާއްޖޭގެ އިމާރާތްކުރުމުގެ ސިނާއަތައް އެ މަނިކުފާނު ގެނެސްދެއްވާފައިވާ ކުރިއެރުމާއި ކޮށްދެއްވާފައިވާ ޚިދުމަތުގެ އަގުވަޒަންކޮށް އެކަން ފާހަގަ ކުރެއްވުމުގެ ގޮތުންނެވެ.
ހައުސިން މިނިސްޓަރުގެ މަޤާމުގައާއި މާލޭ ސިޓީ މޭޔަރުގެ މަޤާމުގައި ހުންނަވައިގެން އެ މަނިކުފާނު ރާއްޖޭގެ ޢިމާރާތް ކުރުމުގެ ސިނާއަތައް ގިނަ ކުރިއެރުންތަކެއް ގެނެސްދެއްވާފައިވާކަން މަސީންވަނީ މި ޙަފުލާގައި ފާހަގަކުރައްވާފައެވެ.
އެގޮތުން ރާއްޖޭގައި މިހާތަނަށް އިމާރާތް ކުރެވުނު އެންމެ އުސް އިމާރާތްތައް ބިނާކުރެވިގެން ދިޔައީ އެ މަނިކުފާނުގެ ބެއްލެވުމުގެ ދަށުންނެވެ. އޭގެތެރޭގައި އައި.ޖީ.އެމް.އެޗް.ގެ 25 ބުރީގެ އިމާރާތާއި، ހިޔާ މަޝްރޫއު ފާހަގަކޮށްލެވެއެވެ.
މީގެ އިތުރުން ރާއްޖޭގެ ތާރީޚުގައި އެޅި ފުރަތަމަ ބުރިޖު ”ޗައިނާ މޯލްޑިވްސް ފްރެންޑްޝިޕް ބުރިޖު“ އެޅީވެސް އެ މަނިކުފާނުގެ ބެއްލެވުމުގެ ދަށުންނެވެ.
