ޗިލީގެ ބޯޑަރު ބަލަހަށްޓާ ސިފައިންގެ މީހަކު އޭނާގެ ޕާސްޕޯޓުގައި ފުރަހައެއް ނުވަތަ ފިރިހެނާގެ ފިރިހެން ހަށީގެ ނަކަލެއް ކުރަހައި، ”ވީވާ ޕަލެސްޓީނިއާ“ މިފަދައިން ލިޔުނުކަމަށް އިސްރާއީލުގެ ފަތުރުވެރިޔަކު ބުނެފިއެވެ.
އެގޮތުން، މި ބަސްތަކުގެ ލަފްޒީ މާނައަކީ ”ލޯންގް ލިވް ޕަލެސްޓައިން“ މިއެވެ. އުމުރުން 25 އަހަރުގެ ޓާލް ޔާކޫބީ އާއި ހަވާލާދީ ދަ އިންޑިޕެންޑެންޓުން ރިޕޯޓުކޯށްފައިވާ ގޮތުގައި އޭނާގެ ޕާސްޕޯޓުގައި ކުރަހައި ޑިފޭސްކޮށްފައިވަނީ އާޖެންޓީނާއިން ޗިލީއަށް އެތެރެވާން މަސައްކަތްކުރިއިރު ޗިލީގެ ބޯޑަރުންނެވެ.
ޓާލް ބުނެފައިވަނީ، އެންމެ ފުރަތމަ ވަގުތުންވެސް ބޯޑަރު އޮފިޝަލް އޭނާއާއިމެދު އަމަލުކުރީ ވަރަށް ހަރުކަށިކޮށްކަމަށާއި، އެނާގެ މޫނާއި ދިމާލަށް ޕާސްޕޯޓު އެއްލައިވެސް ލާފައިވާކަމަށެވެ. އަދި ދޮޅު ގަޑިއިރު ވާންދެން އެތަނުގައި ހިފެހެއއްޓިކަމަށާއި، އެކަން އެގޮތަށް ކޮށްފައިވަނީ ގަސްތުގައި އުނދަގޫކުރުމުގެ ނިޔަތުގައި ކަމަށް އޭނާ ބުންޏެވެ. އިންޑިޕެންޑެންޓުން ލިޔެފައިވާގޮތުގައި ޗިލީއާއި އިސްރާއީލުގެ އެމްބަސީއިންވެސް މިހާދިސާއާއި މެދު ވަކި އެއްޗެއް ބުނުމަށް ވަނީ ދެކޮޅު ހަދާފައެވެ.
ދެކުނު އެމެރިކާގެ ގައުމުތަކުގެ ރައްޔިތުންގެ ފަރާތުން އިސްރާއީލާއި ދެކޮޅު ފިކުރުތަކަކާއި އަމަލުތަކެއް ފާހަގަކުރެވިފައިވާކަން އިސްރާއީލުގެ ފަތުރުވެރިން މީގެކުރިން ވަނީ ފާހަގަކޮށްފައެވެ. މިގޮތުން، ހިނގަމުންމިދާ ޑިސެމްބަރު މަހުގެ ތެރޭގައި، އިސްރާއީލު ފަތުރުވެރީންގެ މެދުގައި މަގުބޫލު ސިޓީއެއް ކަމަށްވާ ބެރީލޯކޭގައި ”ބޮއިކޮޓް އެގެއިންސްޓް އިޒްރޭލީ މިލިޓަރީ ޓުއަރިޒަމް“ މިހެން ލިޔެފައިވާ ޕޯސްޓަރުތަކެއް ހަރުކޮށްފައިވެއެވެ.
އިސްރާއީލުން ޣައްޒާގެ އެތައް ހާސް ތުއްތު ކުދީންތަކެއް ޝަހީދުކޮށް ހިންގަމުންގެންދާ ޤަތުލުއާންމާއި ގުޅިގެން ދިވެހީންވެސް އަންނަނީ އިސްރާއީލު ޕާސްޕޯޓު ހިފައިގެން އަންނަ ފަތުރުވެރީންނަށް ގައުމަށް އެތެރެ ނުވެވޭގޮތަށް މަނާކުރުމަށް ގޮވާލަމުންނެވެ. އެހެންނަމަވެސް، ”ބޭން އިސްރާއީލީ ޕާސްޕޯޓް“ ކެމްޕެއިނާއެކުވެސް އެކަމަށް އަމުރެއް ނެރެފައެއް ނުވެއެވެ. އިސްރާއީލާއި ދެކޮޅު ފިޔަވަޅެއްވެސް އަޅާފައި ނުވާއިރު، ރައްޔިތުންގެ މަޖިލީހުން ކޯސްދެނީ ރައީސުލްޖުމްހޫރިއްޔާއަށެވެ. އަދި ރައީސުލްޖުމްހޫރިއްޔާ ކޯސް ދެއްވަނީ ރައްޔިތުންގެ މަޖިލީހަށެވެ.
