ޔަމަނުގެ ހޫތީންގެ ކިބައިން ރަތްކަނޑުގައި ދަތުރުކުރާ އިސްރާއީލުގެ މަސްލަހަތު އޮންނަ އުޅަނދުފަހަރު ހިމާޔަތްކުރުމަށްޓަކައި ”އޮޕަރޭޝަން ޕްރޮސްޕެރިޓީ ގާޑިއަން“ ގެ ނަމުގައި އެމެރިކާ އިސްވެ އޮވެ އުފެއްދި ބައިންލައަޤްވާމީ ޓާސްކްފޯސް ބޮޑުތަނުން ފޭލުވެއްޖެއެވެ. 

އެގޮތުން، މި ޓާސްކްފޯހުގައި ބޮޑު ރޯލެއް ކުޅޭނެކަމަށް އެމެރިކާއިން އުންމީދުކުރި ގައުމުތަކެއް ކަމުގައިވާ، ފްރާންސާއި، އިޓަލީގެ އިތުރުން ސްޕެއިންވެސް މި އޮޕަރޭޝަނާއި ވަކިވުމާއެކު، ހޫތީ މުޖާހިދުންނާއި ދެކޮޅަށް އެކުލަވާލި މި ބައިނަލްއަޤްވާމީ އެއްބައިވުން ބަލިކަށިވެގެން ގޮސްފިއެވެ. މިއީ ބައިނަލްއަޤްވާމީ މަސްރަޙުގައި އެމެރިކާގެ ބާރުކެނޑެމުންދާކަމުގެ އަލާމާތެއްކަމަށް ގިނަ ބަޔަކު ގަބޫލުކުރާއިރު، އެމެރިކާއިން ޔަމަނާއި ކުރިމަތިލާންޖެހޭނީ ބަހްރޭނާއި ސެޝެލްސްގެ އެހީތެރިކަމާއިއެކުގައި އެކަންޏެވެ. 

އިސްރާއީލުން ޣައްޒާގައި ހިންގަމުންދާ ޤަތުލުއާންމާއި ގުޅިގެން ޔަމަނުގެ ހޫތީ ސިފައިން އަންނަނީ ރަތްކަނޑު ހުރަސްކޮށް އިސްރާއީލަން ދަތުރުކުރާ ބޯޓުފަހަރާއި އިސްރާއީލުން ފުރައިގެންދާ ބޯޓުތަކަށް ހަމަލާދެމުންނެވެ. މިގޮތަށް ހަމަލާދޭއިރު، އެ އުޅަނދަކީ ކޮން ގައުމެއްގެ ކޮން ދިދައެއް އުފުލާ އުޅަންދެއްތޯ ނުބަލާނެކަން އަންގައި ހޫތީންވަނީ އިންޒާރުދީފައެވެ. 

ޔަމަނުން ދެމުންގެންދާ ހަމަލާތަކުގެ ސަބަބުން ތެލާއި، ކާޑުގެ ބާވަތްތަކުގެ އިތުރުން އެހެނިހެން އަސާސީ މުދާ އުފުލުމަށް އިސްރާއީލަށް ދަތިވެފައިވާއިރު، މުދާ އުފުލުމުގެ އަގާއި، މުދާ ރައްކާތެރިކުރުމަށް އިންޝުއަރ ކުރުމުގެ ޚަރަދުތައް އިންތިހާއަށް ބޮޑުވެ، އިސްރާއީލުގެ އިޤްތިޞާދަށް އަންނަނީ ބޮޑެތި ގެއްލުންތަކެއް ލިބެމުންނެވެ.