މި މަހުގެ ތިންވަނަ ދުވަހު އދ.ދިގުރަށު ކުނިގޮނޑުގައި މަރުވެފައި އޮއްވާ ފެނުނު ތުއްތު ކުއްޖާގެ ހަށިގަނޑު ޕޯސްޓްމޯޓަމް ހެދުމަށްފަހު ރާއްޖެ ގެނެސްފިއެވެ.
މި ކުއްޖާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވީ މި މަހުގެ 15 ވަނަ ދުވަހުއެވެ. ފުލުހުން މިއަދު ބުނީ ޕޯސްޓްމޯޓަމް ހެދުމަށްފަހު މިދިޔަ ހުކުރު ދުވަހު ކުއްޖާގެ ހަށިގަނޑު ރާއްޖެ ގެނެސްފައިވާ ކަމަށެވެ.
ތުއްތު ކުއްޖާގެ މަރުގެ މައްސަލާގައި ހައްޔަރުކުރީ ލަންކާގެ އުުމުރުން 30 އަހަރުގެ އަންހެނެކެވެ. އޭނާ ހައްޔަރުކުރީ މި މަހުގެ 3 ވަނަ ދުވަހު ދިގުރަށުން ފުރައިގެން މާލެ ގޮސް ލަންކާއަށް ފުރަން ގޮސް ހުއްޓައި ވެލާނާ އިންޓަނޭޝަނަލް އެއާޕޯޓުންނެވެ. އޭނާ ހައްޔަރުކޮށް ޝަރީއަތް ނިމެންދެން ބަންދުކޮށްފައިވާއިރު ފުލުހުން އޭނާގެ މައްޗަށް ކުރަނީ ގަސްދުގައި ކުއްޖަކު މެރިކަމުގެ ތުހުމަތެވެ.
