ރިޔާސީ ކެމްޕޭނުގައި ދެއްކެވީ ހުވަފެނެއް ނޫން ކަމަށާއި އެއީ ހަގީގަތްކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރޭ ކުރިއަށްދިޔަ ”ކަންގަތި އެވޯޑް 2023“ ދިނުމުގެ ހަފުލާގައި ވާހަކަފުޅު ދައްކަވަމުންނެވެ.
“ކެމްޕެއިނުގައި އަޅުގަނޑު ތިޔަބޭފުޅުންނާ ހަމައަށް ގެންދިޔައީ ފަހަރެއްގައި ވެސް ހުވަފެނެއް ނޫން. އަޅުގަނޑު ތިޔަބޭފުޅުންނާ ހަމައަށް ގެންދިޔައީ ހަގީގަތް. އެކަމަކު އޮށުން ގަސްފަޅައި މޭވާ ލިބެނީ، އެ ކަމަށް އެކަށީގެންވާ މުއްދަތު ލިބުނީމާ. އިރާދަކުރެއްވިއްޔާ، އޮށަކުން ނިރު ފަޅަންޖެހޭ މޫސުމުގައި ނިރުފަޅާ ގޮތަށް، މާފޮޅެންޖެހޭ މޫސުމުގައި، މާ ފޮޅޭގޮތަށް އަދި މޭވާ ފައްކާވާންޖެހޭ މޫސުމުގައި މޭވާ ފައްކާވާ ގޮތަށް، މި ފަސް އަހަރުގެ ތެރޭގައި، އަޅުގަނޑު ވީ ހުރިހާ ވައުދެއް، ތިޔަ ލޮބުވެތި ދިވެހި ރައްޔިތުންނަށްޓަކައި ތަރުތީބުން އަޅުގަނޑުގެ ޓީމުން އުފަލާ އެކީގައި ފޯރުކޮށްދޭނަން.“
ރައީސް ވިދާޅުވީ ދުވަހުން ދުވަހަށް އެ ކަންކަން އެ ދަނީ ކުރެވެމުން ކަމަށާއި އެ ކަންކަން ދާނީ ފުރިހަމަވަމުން ކަމަށެވެ.
“އަޅުގަނޑުގެ އެބައޮތް ސުވާލެއް. މިއިން އެއްވެސް ކަމެއް ހާސިލުނުވެ، ކޮންމެ ފަސް އަހަރަކުން ދިވެހީން ވޯޓުލާން މި ޖެހެނީ ކީއްވެތޯ؟ ދިވެހި އާންމު ރައްޔިތު މީހާއަށް މި ޤައުމުގައި އޮތް ހަމައެކަނި ހައްގަކީ ވޯޓުލުމުގެ ހައްގުތޯ؟ ތިޔާގިކަމާއި މުއްސަނދިކަމަކީ އެ ވޯޓުން ހޮވޭ މީހުންގެ މިލްކެއްތޯ؟ އަޅުގަނޑަކަށް މި ގޮތް ގަބޫލެއް ނުކުރެވޭ. ގަބޫލެއް ނުވެސްކުރާނަން.“ ރައީސް ވިދާޅުވިއެވެ.
ރައީސް ވިދާޅުވީ ފުރާވަރު ކުދިން އުފަލުގައި އުޅޭތަން ދެކެން ބޭނުންފުޅުވާ ކަމަށާއި އާ ކައިވެނީގެ ގުޅުންތައް ހަރުދަނާވެ، ރީތި ގެޔެއްގައި ތަހުޒީބު ދިރިއުޅުމެއް އުޅޭތަން ދެކެން ބޭނުންފުޅުވާ ކަމަށާއި ޒުވާނުންނާއި، ދުވަސްވީ އިސްރަށްވެހީން ސަމާސާކޮށްލައި، އިހުތިރާމާއެކު، ކަމޭހިތުމާއެކު އުޅޭތަން ދެކެން ވެސް ބޭނުންފުޅުވާ ކަމަށެވެ. އަދި އަބަދުވެސް ދިވެހި ރައްޔިތުންނަށް ހއްގުވާ ކުރިއެރުމާއި، ގެދޮރާއި، ދިވެހި ގައުމަށް ލިބެންޖެހޭ އިއްޒަތާއި ގަދަރާ ވަރަށް މުހިންމު ކަމަށެވެ.
