ޗައިނާ ސަރުކާރުގެ ވުޒާރާތަކާއި، ސަރުކާރު ހިއްސާވާ ކުންފުނިތަކުގެ މުވައްޒަފުން ވަޒީފާގެ މާހައުލުގައި އެޕަލް (އޭއޭޕީއެލް.އޯ) އައިފޯނު ފަދަ ބިދޭސީ ކުންފުނިތަކުން އުފައްދާ އާލާތްތައް ގެންގުޅުން މަނާކުރަމުން އަންނަކަމަށް ބްލޫމްބާގް ނިއުސްއިން ހުކުރު ދުވަހު ރިޕޯޓުކޮށްފިއެވެ.
ގައުމުން ބޭރުގެ ޓެކްނޮލޮޖީއާއި، ގައުމުން ބޭރުގެ ވަސީލަތްތަކަށް ބަރޯސާވާ މިންވަރު މަދުކުރުމަށް ޗައިނާއިން މަސައްކަތްކުރަމުން އަންނަތާ މިހާރު ދިހަ އަހަރަށްވުރެ ގިނަ ދުވަސްވެފައިވާއިރު، ޗައިނާގެ ސަރުކާރުން އަންނަނީ ސަރުކާރުގެ މުއައްސަސާތަކާއި ބޭންކުފަދަ ތަންތަނުން ބޭނުންކުރާ ސޮފްޓްވެއަރތައްވެސް ދޭސީ އުފެއްދުންތަކަށް ބަދަލުކުރުމަށް ގޮވާލަމުންނެވެ.
އަދި އެގައުމުންވަނީ އަމިއްލައަށް ސެމީކޮންޑަކްޓަރ ޗިޕް އުފެއްދުންވެސް އިތުރުކޮށްފައެވެ. މިގޮތުން، ފާއިތުވި ދެމަސްދުވަސް ތެރޭގައި، ޗައިނާގެ އަށް ޕްރޮވިންސެއްގައި ހުންނަ ސަރުކާރުގެ ވުޒާރާތަކާއި، ސަރުކާރު ހިއްސާވާ ކުންފުނިތަކުގެ އޮފީސްތަކުގައި މަސައްކަތްކުރާއިރު، މުވާސަލާތީ ވަސީލަތްތަކުގެ ގޮތުގައި ޗައިނާގެ އުފެއްދުންތައް ގެންގުޅުމަށް އެތަންތަނުގެ މުވައްޒަފުންނަށް އަންގާފައިވާކަމަށް ބްލޫމްބާގް ނިއުސްއިން ބުނެއެވެ.
ބްލޫމްބާގް ނިއުސްއިން ބުނެފައިވަނީ، މިދިޔަ ޑިސެމްބަރު މަހުގެ ތެރޭގައި، ހެބެއި އާއި، ލިއާއޮނިންގްއާއި، ޝަންޑޮންގް އަދި ޖެޖަންގް ޕްރޮވިންސްގައި ހުންނަ ސިޓީތަކުގެ ސަރުކާރުގެ ވުޒާރާތަކުގައި މަސައްކަތްކުރާ ފަރާތްތަކުން އެތެރޭގެ އުފެއްދުންތައް ގެންގުޅުމަށް އަނގަބަހުން އަންގާފައިވާކަމަށެވެ.
އައިފޯނު އުފައްދާ އެންމެ ބޮޑު ކާރުހާނާ ހުންނަނީ ހެބެއި ޕްރޮވިންސްގައެވެ.
