މަސްވެރިކަމުގެ ސިނާއަތުގެ އުފެއްދުންތަކަށް ޚާއްސަ ބްރޭންޑެއް ތައާރަފުކޮށް އެ އުފެއްދުންތައް އިޝްތިހާރުކޮށް މާކެޓުކުރުމަށް ”މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކޯޕަރޭޝަން“ގެ ނަމުގައި ޚާއްސަ ކުންފުންޏެއް އުފެއްދެވުމަށް ސަރުކާރުން މިއަދު ނިންމަވައިފިއެވެ.
މިފަދަ ކުންފުންޏެއް އުފެއްދެވުމަށް ރައީސް ޑރ.މުޙައްމަދު މުޢިއްޒު ނިންމެވީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން މިއަދު ވަޒީރުންގެ މަޖިލީހަށް ހުށަހެޅުއްވި ކަރުދާހަށް މަޝްވަރާކުރެއްވުމަށް ފަހު ވަޒީރުން ދެއްވި ލަފާފުޅުގެ މަތިންނެވެ.
ސައްތައިން ސައްތަ ސަރުކާރު ހިއްސާވާ މި ކުންފުންޏަކީ އެކުއަކަލްޗަރ، މެރިކަލްޗަރ ފަދަ ކަނޑުގެ ހުރިހާ ރިސޯސްތައް ހިމެނޭގޮތަށް ރާއްޖޭގެ މަސްވެރިކަމުގެ އުފެއްދުންތައް އިޝްތިހާރުކޮށް އޭގެ ވިޔަފާރިން ލިބޭ މަންފާ އިތުރުކުރުމަށްޓަކައި އުފައްދަވާ ކުންފުންޏެކެވެ.
ސަރުކާރުން ބުނީ މި ކުންފުނިން ރާއްޖޭގެ އުފެއްދުންތަކަށް ޚާއްސަ ބްރޭންޑެއް ތައާރާފުކޮށް އެ ތަކެތި ޕްރިމިއަމް އުފެއްދުންތަކެއްގެ ގޮތުގައި ގައުމީ އަދި ބައިނަލްއަގުވާމީ މާކެޓްތަކަށް ނެރުމާއި އުފެއްދުންތަކަށް އައު މާކެޓްތައް ހޯދުމުގެ މަސައްކަތް ކުރާނެ ކަމަށެވެ.
މިއަދުގެ ބައްދަލުވުމުގައިި ވަނީ މީގެ ކުރިން އޮތް މޯލްޑިވްސް ފިޝަރީޒް ޕްރޮމޯޝަން ބޯޑު އުވާލެއްވުމަށް ވެސް ނިންމަވައިފައެވެ.
މީގެކުރިން ބޭއްވެވި ވަޒީރުންގެ މަޖިލީހުގައި ވަޒީރުން އެރުވި ލަފާފުޅާއެކު ރައީސް ވަނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އަކީ 100 އިންސައްތަ ސަރުކާރު ހިއްސާވާ ކުންފުންޏެއް ކަމަށް ކަނޑައަޅުއްވައިފައެވެ. މީގެ ކުރިން މިފްކޯ ހިންގަމުންދިޔައީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ ސަބްސިޑިއަރީ ކުންފުންޏެއްގެ ގޮތުގައެވެ.
