ރާއްޖެއާއި އިންޑިއާއާ ދެމެދު ގާއިމުކޮށްފައިވާ ހައިޑްރޯގްރަފީ ސާވޭ ހެދުމުގެ އެއްބަސްވުން އާ ނުކުރަން ނިންމާފައިވާކަން އިންޑިއާއަށް އަންގާފައިވާ ކަމަށް ސަރުކާރުން މިއަދު ހާމަކޮށްފިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުގެ “ހަފުތާ 14“ ގައި ހިމެނޭ ކަންކަމުގެ ތެރެއިން ހަތަރު ހަފުތާގެ ތެރޭގައި ފުރިހަމަވެފައިވާ ކަންކަން މީޑިއާތަކަށް ހިއްސާކުރުމަށް ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ޕަބްލިކް ޕޮލިސީގެ އަންޑަ ސެކްރެޓަރީ މުޙައްމަދު ފިރުޒުލް ޚަލީލު ވިދާޅުވީ އިންޑިއާ ސަރުކާރުގެ އެހީގައި ރާއްޖޭގެ ކަނޑުގެ ސަރަހައްދުގައި ކުރިއަށްގެންދާ ސާވޭގެ އެއްބަސްވުން އޮތީ 07 ޖޫން 2024 ގައި މުއްދަތު ހަމަވާ ގޮތަށް ކަމަށެވެ. އަދި މި އެއްބަަސްވުން އާކުރަން ބޭނުންނުވާނަމަ އޭގެ 06 މަަސް ކުރިން އަންގަންޖެހޭ ކަމަށާއި އެހެން ނޫންނަމަ އިތުރު 05 އަހަރަށް އެއްބަސްވުން އާވެގެންދާނެ ކަމަށެވެ.
އެހެންވެ އެއްބަސްވުން އާނުކުރަން ނިންމާފައިވާކަން އިންޑިއާ ސަރުކާރަށް މިހާރު އަންގާފައިވާ ކަމަށާއި މިއީ ބޭރު ގައުމުތަކާއެކު ހަދާފައިހުރި ގައުމީ ސަލާމަތަށް ނުރައްކާވާފަދަ އެއްބަސްވުންތައް އުވާލުމާ ގުޅޭ ވައުދުގައި ހިމެނޭ ކަމެއް ކަމަށް އޭނާ ވިދާޅުވިއެވެ. މި އެއްބަސްވުން އާ ނުކުރަން ނިންމީ ރާއްޖޭގެ ކަނޑުފަޅުގެ ސިއްރުތައް ހިފެހެއްޓުމަށް ކަމަށް ވެސް ފިރުޒުލް ވިދާޅުވިއެވެ.
One Response
އެއްބަސްވުން އައު ނުކުރި ނަމަވެސް، ވެފައިވާ އެއްބަސް ވުމުން މަސައްކަތް ކުރި ވަރަކާއި އެއްކުރި މައުލޫމާތުތަކާއި ރާއްޖެއަށް ލިބުނު ފައިދާއާއި ގެއްލުން ވެސް ބަލަންޖެހޭނެ ކަމަށް ގަބޫލުކުރެވެއެވެ. އަދި އެއްކޮށްފައިވާ މައުލޫމާތު ވެސް ލިބެން ޖެހޭނެ ކަމުގައި ދެކެމެވެ.