100 ޔޫއެސް ޑޮލަރުގެ ސައްޙަނޫން ނޫޓުތަކެއް ބާޒާރުގައި ދައުރުވަމުންދާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން ހޯމަ ދުވަހު ނެރުނު ނޫސްބަޔާނެއްގައި ބުނެފައިވާގޮތުގައި ދައުރުވަމުންދަނީ 1996 އާއި 2016 ވަނަ އަހަރާއި ދެމެދު ޗާޕުކުރެވިފައިވާ، ހުދު ބޯޑަރު އެޅި 100 ޔޫއެސް ޑޮލަރުގެ ނޫޓުތަކެކެވެ. އަދި އެ ނޫޓުތަކުން ފާހަގަކުރެވުނު ސައްހަ ނޫޓުތަކާއި ޚިލާފު ބައެއް ސިފަތައް އެމްއެމްއޭއިން ވަނީ ފާހަގަކޮށްފައެވެ.
މިގޮތުން އެމްއެމްއޭއިން ބުނެފައިވަނީ، މި ނޫޓުތައް ޗާޕުކޮށްފައި ހުރީ ސައްޙަ ނޫޓު ޗާޕުކޮށްފައި ހުންނަ ކަރުދާހާއި ތަފާތު ކަރުދާހެއްގައި ކަމަށާއި، ސައްހަ ނޫޓުގެ ކަނާއަތްފަރާތުގައި އަލިއެޅުމުން ފެންނަން ހުންނަ ބެންޖަމިން ފްރެންކްލިންގެ ތަސްވީރު ހިމެނޭ ފެންމަރުކާ ނުވަތަ ވޯޓަރމާކްވެސް ތަފާތުކަމަށެވެ.
މީގެއިތުރުން، އައްޔާއި ދިމާކުރުމުން ނޫޓުގެ ވައަތްފަރާތުން ފެންނަންހުންނަ ”ޔޫއެސްއޭ100“ ލިޔެފައިވާ ސަލާމަތީ ރޮދިފަށް ނޫޓުގެ ދެފަރާތުން ފެންނަން ނުހުންނަކަމަށާއި، ޔޫވީ ލައިޓު އެޅުމުން ދިއްލިފައި ހުންނަންޖެހޭ ސަލާމަތީ ރޮދިފަށް ދެފަރާތުގައި ދިއްލިފައިވެސް ނުހުންނަކަމަށް އެމްއެމްއޭއިން ބުނެއެވެ.
އެމްއެމްއޭގެ ބަޔާނުގައި އިތުރަށް ބުނެފައިވަނީ މިހާރު ދައުރުވަމުންދާ ނޫޓުތައް ޔޫވީ ލައިޓާއި ދިމާކުރުމުން ނޫޓުގެ މޫނުމަތީގައި ރަތް އަދި ނޫކުލައިން ދިއްލިފައި ހުންނަންޖެހޭ ސެކިއުރިޓީ ފައިބަރ ވެސް ނުހުންނަކަމަށާއި، ނޫޓުގެ ކަނާއަތް ފަރާތުން ތިރީގައި ހިމަނާފައިވާ މޫނުމަތީ އަގު ނޫޓު އަރިކުރުމުން ކުލަވެސް ބަދަލު ނުވާކަމަށެވެ.
ވީމާ ޔޫއެސް ޑޮލަރުގެ 100 ގެ ނޫޓުތައް ބަލައިގަތުމުގައި މިކަންކަމަށް ސަމާލުކަން ދިނުމަށް އެމްއެމްއޭއިން ނަސޭހަތްތެރިވެފައިވެއެވެ. އަދި އެފަދަ ނޫޓެއްކަމަށް ޝައްކުކުރެވޭ ނޫޓެއް ފާހަގަވެއްޖެނަމަ، އެމްއެމްއޭއަށް ގެންގޮސް އޭގެ ސައްހަކަން ކަށަވަރުކުރުމަށްވެސް އެމްއެމްއޭއިން ވަނީ ލަފާދީފައެވެ.
2 Responses
Kuru video kolheh hadhdhavaa lavaafa shear kolewun Gina bayakah faseyha vaane kamah feney
ޑޮލަރު ނުލިބިގެން އުޅޭ ފަގީރު މީހާއަށް ހުރިހާވެސް ދެރައެއް.. މުއްސަނދިމީހާ ޑޮލަރު ވިއްކާލީމާ އޭނާއަށް ލިބޭ އެއްޗެއް ލިބޭނެ. ވަގު ޑޮލަރ ގެންގުޅޭކަން އިޝްތިހާރު ނުކޮށް އެމީހުން ހޯދަން މަސައްކަތްކުރުން މާރަނގަޅުވާނެ. އިޝްތިހާރު ކުރުމުގެ ބޭނުމަކީ ރައްކާތެރިވެ ތިބޭށޭ ބުނުންކަހަލަ ކަމެއް.