ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ސިޔާސީ ދާއިރާއިން މި ވަގުތަށް ދުރަށް ޖެހިވަޑައިގެންފިއެވެ.
ރައީސް ނަޝީދު މިރޭ ނެރުއްވި ބަޔާނެއްގައި ވިދާޅުވީ އަހަރުތަކަކަށްފަހު ސިޔާސީ މައިދާނާއި ދުރަށް ވަޑައިގަތުމަށް ނިންމާފައިވާ ކަމަށެވެ. ހަމަ އެހެންމެ ކުރިއަށް އޮތް މަޖިލިސް އިންތިޚާބުގައިވެސް ވާދަ ނުކުރުމަށް ނިންމާފައިވާ ކަމަށް ރައީސް ނަޝީދު ވަނީ ވިދާޅުވެފައެވެ.
ސިޔާސީ މަސައްކަތުގައި އެންމެ ބޮޑަށް މަސައްކަތް ކުރެއްވީ ގިނަ ޕާޓީ އެކުލެވޭ ވެރިކަމުގެ ނިޒާމެއް ފައްކާ ކުރުމަށް ކަމަށާއި ރާއްޖެ އަކީ އިސްލާމީ މަތިވެރި އުސޫލުތައް ހިފަހައްޓާ އިންސާނީ ހައްޤުތަކަށް އިހްތިރާމު ކުރާ ރައްޔިތުންނަށް ދުލާއި ގަލަމުގެ މިނިވަންކަން ކަށަވަރު ކުރެވިފައިވާ ތަނަކަށް ހެދުމަށްވެސް މަސައްކަތް ކުރެވުނު ކަމުގައި ރައީސް ނަޝީދު ވިދާޅުވި އެވެ. މިގޮތުން އެކަންކަން ކުރިއަށް ވުރެ މާބޮޑަށްވެސް ރާއްޖޭގައި އަށަގަނެފައިވާ ކަމަށް ގަބޫލުކުރައްވާ ކަމަށް އެ މަނިކުފާނު ވަނީ ވިދާޅުވެފައެވެ.
ސިޔާސީ މަސައްކަތުގައި ނުހަނު އަނިޔާއާއި ހިތާމަވެރި ކަމާއި އެކަނިވެރިކަން ލިބިފައިވާ ކަމަށާއި ޖަލުގެ އަނިޔާއާއި އެތައް ފަހަރެއްގެ ބަންދު ތަހައްމަލު ކުރާން ޖެހި އާއިލާއާއި ދުރުގައި އުޅެންޖެހި މުޅި ޒާތީ ހަޔާތް ބަރުބާދުވެފައިވާ ކަމަށް ރައީސް ނަޝީދު ވަނީ ވިދާޅުވެފައެވެ. މީގެ އިތުރުން ބޮމުގެ ހަމަލާއިން މަރުގެ ތުންފަތް މައްޗަށް ހުށަހެޅި ބޮލުގައި އެޅިދިޔަ ކޮންމެ މަޅިއެއް ވަނީ މާފައްޗަކަށް ބަދަލުވެފައި ކަމަށް ރައީސް ނަޝީދު ވަނީ ވިދާޅުވެފައެވެ.
ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމާއި ރައްޔިތުންގެ މަޖިލީހުގެ ރައީސްގެ މަޤާމުގައި ހުންނަވައިގެން ވީ މިންވަރަކުން ރާއްޖޭގެ ރައްޔިތުންނަށް ޚިދުމަތްކޮށްދީފައި ވާނެ ކަމަށްވެސް ރައީސް ނަޝީދު ވަނީ ވިދާޅުވަފައެވެ.
ރައީސް ނަޝީދު ވަނީ ސިޔާސީ ދާއިރާއިން މިވަގުތަށް ދުރަށް ވަޑައިގަންނަވާކަން ހާމަކޮށް އެ މަނިކުފާނުގެ ސިޔާސީ މަސައްކަތުގައި ހޭދަ ކުރެއްވި މުއްދަތުގައި އެހީތެރިކަން ފޯރުކޮށްދިން ހުރިހާ ފަރާތްތަކަށް ޝުކުރު އަދާކުރައްވާފައެވެ.
ރައީސް ނަޝީދުގެ ބަޔާން ނިންމާލައްވަމުން ވިދާޅުވީ ރާއްޖެ ހިމެނޭ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނަރަލްގެ މަޤާމު, ކުރިއަށް އޮތް ޖަނަވަރީ މަހުން ފެށިގެން އަދާކުރައްވަން ފަށްޓަވާނެ ކަމަށެވެ.
