ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަގާމަށް މަޝްހޫރު ވިޔަފާރިވެރިޔާ މުޙައްމަދު ޢަލީ ޖަނާޙް އައްޔަން ކުރައްވައިފިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއްޔެ މަގާމުގެ ހުވާކުރެއްވުމަށްފަހު ވަނީ ރައީސުލްޖުމްހޫރިއްޔާގެ އޮފީހުގެ ބައެއް މަގާމުތަކަށް ބޭފުޅުން އައްޔަން ކުރައްވައިފައެވެ.
އެ ބޭފުޅުންނަށް މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ ރޭ 20:00 ގައި ރައީސުލްޖުމްހޫރިއްޔާގެ އޮފީހުގައެވެ.
އެގޮތުން ރައީސްގެ ސްޕެޝަލް އެޑްވައިޒަރ ޓު ދަ ޕްރެޒިޑެންޓްގެ މަގާމަށް އައްޔަން ކުރެއްވީ ޕީއެންސީގެ ޗެއާޕާސަން ޢަބްދުއްރަޙީމް (އަދުރޭ) އެވެ.
މީގެއިތުރުން ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަގާމަށް މުޙައްމަދު ޢަލީ ޖަނާޙް އައްޔަން ކުރެއްވިއިރު, އެޑްވައިޒަރ ޓު ދަ ޕްރެޒިޑެންޓް އޮން ޓޫރިޒަމް ޑިވެލޮޕްމަންޓްގެ މަގާމަށް މުޙައްމަދު ޚަލީލް ވަނީ އައްޔަން ކުރައްވައިފައެވެ.
ރައީސުލްޖުމްހޫރިއްޔާގެ އޮފީހުން ބުނީ ޖަނާހުއާއި ޚަލީލަކީ އެއްވެސް މުސާރައެއް އިނާޔަތެއް ނުނަންގަވާ ގޮތަށް އެ މަގާމުތަކަށް ހަމަޖައްސަވާފައިވާ ދެ ބޭފުޅުން ކަމަށެވެ.
One Response
ފައިސާގެ ތަނަވަސްކަން ލިބިވަޑައިގެން ތިއްބެވި ހުނަރުވެރި ބޭފުޅުން ހިލޭ ސާބަހަށް ޚިދުމަތްކޮށްދެއްވުމަކީ ވަރަށް ރަނގަޅު ކަމެކެވެ. އެކަމަށްޓަކައި އުފާކުރުންވެސް ރަނގަޅެވެ. އެހެންނަމަވެސް ބައެއްފަހަރު ބައެއްބޭފުޅުން ހިލޭ ސާބަހަށް ޚިދުމަތް ކުރުމުގެ ނަމުގައި އެހެނިހެންގޮތްގޮތުން ފައިދާ ނަގަމުންދިޔަ ޚަބަރުތައް ނޫސްތަކުގެ ފަލަ ސުރުޚީންވެސް ވަނީ ފެނިފައެވެ.