ސައުދީ އަރަބިއާގެ ރިޔާދުގައި އަރަބި ގައުމުތަކުން ބައިވެރިވާ ގޮތަށް ބޭއްވި ބޮޑު ބައްދަލުވުމުގައި ބައިވެރިވުމަށް އެ ގައުމުން އަފްޣާނިސްތާނަށް ދައުވަތު ދިންކަމަށް އަފްޣާނިސްތާނުގެ ވެރިކަންކުރާ ޠާލިބާނުން ބުނެފިއެވެ.
ޠާލިބާން ޕަބްލިކް ރިލޭޝަންސް ޑިޕާޓްމަންޓުގެ އެކްސް އެކައުންޓުން ކުރި ޓްވީޓެއްގައި ބުނެފައިވަނީ، މުސްލިމް ގައުމުތަކުގެ ތެރެއިން މި މަހާސިންތާގައި ބައިވެރި ނުވަނީ ހަމައެކަނި އަފްޣާނިސްޠާނުންނެވެ. އަދި ސައުދީ އަރަބިއާއިން ދައުވަތު ދިންކަމަށާއި، އެހެންނަމަވެސް، ޠާލިބާނުގެ ވެރިޔާ އެދައުވަތަށް ރައްދު ދެއްވިކަމަށް އެ ޓްވީޓުގައި ބުނެފައިވެއެވެ.
”(ބައްދަލުވުމަކަށް) ދައުވަތެއް ބޭނުމެއްނުވޭ. މުސްލިމް ގައުމުތަކުގެ އަސްކަރިއްޔާތަކުން އެއްވުމަށް ހަމަޖެހިފައިވާ ތަން އަންގާ.“ ސުޕްރީމް ލީޑަރުގެ ޖަވާބަކީ މިއީ ކަމަށް ޠާލިބާނުގެ ޕީއާރް ޑިޕާޓްމަންޓުން ބުންޏެވެ.
އަދި މި ރައްދާއެކު، ސައުދީ އަރަބިއާއިން ދިން ދައުވަތު އަނބުރާ ގެންގޮސްފައިވާކަމަށް އެ ވުޒާރާއިން ވަނީ ބުނެފައެވެ.
ސައުދީ އަރަބިއާގައި ބޭއްވި ބައްދަލުވުމަށް ދިން ދައުވަތަށް ޠާލިބާނުން ދިން ރައްދަކީ އިސްރާއީލުން ޣައްޒާއަށް ދެމުންގެންދާ ހަމަލާތަކަށް މުސްލިމް ދުނިޔޭގެ ވެރިން ދެލޯ މަރާލާފައިވާކަމަށް ގިނަ ބަޔަކު ބުނެ ފާޑުކިޔަމުން އަންނަ ދަނޑިވަޅެއްގައެވެ.
