އިޒްރޭލާއެކު ހަތިޔާރުގެ އެއްވެސް މުއާމަލާތެއް ކުރުން މަނާކޮށް އެމްބާގޯ އިއުލާނުކުރުމަށް ސްޕެއިންގެ ބޮޑުވަޒީރުގެ ނައިބު، ޔޮލާންޑާ ޑިއޭޒް ގޮވާލައިފިއެވެ.
މިއީ އިޒްރޭލުން ޣައްޒާއާ ދެކޮޅަށް ދެމުން އަންނަ ހަމަލާތަކަށް ބައިނަލްއަޤްވާމީ ދުނިޔޭގެ ކަންބޮޑުވުމުގެ ނަތީޖާއެއްގެ ގޮތުން ސްޕެއިންގެ ސަރުކާރަށް ހުށަހަޅާފައިވާ ހުށައެޅުމެކެވެ.
އިޒްރޭލުން ދެމުންދާ ލާއިންސާނީ ހަމަލާތަކުގައި ޝަހީދުކޮށްލާފައިވާ މީހުންގެ އަދަދުތައް އިތުރުވެ، އިޒްރޭލުން ޣައްޒާގައި ހިންގަމުން އަންނަނީ ޤަޠުލުއާންމެއްކަމީ އެންމެން ދަންނަ ހަގީގަތެކެވެ. އަދި ޑިއޭޒްފަދަ ލީޑަރުން ހަރުކަށި ފިޔަވަޅުތަކަށް ގޮވައިލަމުން އަންނަނީ މި ސަބަބާ ހުރެއެވެ.
އިޒްރޭލުގެ މައްޗަށް ޑިޕްލޮމެޓިކް ފިއްތުންތައް އެޅުމަށް ގޮވާލައި، އިޒްރޭލުން ޣައްޒާއަށް ދެމުންދާ ހަމަލާތައް ހުއްޓާލުމަށް ސްޕެއިންއިން ގޮވާލާފައިވާއިރު، މިއީ ފަލަސްތީނު އިޒްރޭލް މައްސަލާގައި އަޑުއުފުލަމުންދާ ގައުމުތަކުގެ ލިސްޓަށް އިތުރުވެގެންދިޔަ ނަމެކެވެ.
