ރައްޔިތުން މަޖިލީހުގެ އެމްޑީޕީ މެމްބަރުން މަޖިލީހުގެ އިދާރީ މުވައްޒަފުންނާ ކުރިމަތިލައި އެ ބޭފުޅުންގެ ތަކެއްޗައް ގެއްލުން ދީފައިވާތީ އެ އަމަލުތަކުގައި ޖިނާއީ ކުށެއްވާނަމަ ބަލައިދިނުމަށް ދަ ޑިމޮކްރެޓްސް ޕާޓީން ގޮވާލައިފިއެވެ.
ޑިމޮކްރެޓްސް ޕާޓީން މިއަދު ނެރުނު ބަޔާނެއްގައި ބުނީ ރައްޔިތުންގެ މަޖިލީހުގެ ޖަލްސާކުރާ މާލަމުގައި މިއަދު އެމްޑީޕީއަށް ނިސްބަތްވާ މެންބަރުން މަޖިލީހުގެ އިދާރީ މުވައްޒަފުންނާއި ކުރިމަތިލައި, ދިމާކޮށް އެ ބޭފުޅުންގެ ތެރެއިން ކައުންސެލް ޖެނެރަލް އަލްއުސްތާޒާ ފާތިމަތު ފިލްޒާ ބޭނުންކުރައްވާ ކޮމްޕިޔުޓަރ ސިސްޓަމް ވައްޓާލައި މޯބައިލް ފޯނަށާއި އަތް ދަބަހަށް އަމާޒުކޮށް ފެންޖަހައި، އެ ތަކެއްޗަށް ގެއްލުންދީފައި ވާތީ، ޑިމޮކްރެޓްސްގެ ޕާލެމެންޓްރީ ގްރޫޕުން އެކަން ހަރު އަޑުން ކުށްވެރި ކުރާ ކަމަށެވެ.
ހަމަ އެހެންމެ މަޖިލީހުގެ ނައިބު ރައީސް އީވާ މަޖީލީހަށް ހާޒިރުވެފައިނުވާ ސަބަބު މަޖިލީހުގެ އަމީން އާންމު ވިދާޅުވުމާއި ގުޅިގެން އިދާރީ މޭޒު ދޮށަށް އެމްޑީޕީ މެމްބަރުން އެއްވެ ހަޑިހުތުރު އެއްޗެތި ގޮވައި އިދާރީ މުވައްޒަފުންގެ ތަކެއްޗަށް ގެއްލުންދީފައިވާ ކަމަށާއި މަރަދޫ ދާއިރާގެ އެމްޑީޕީ މެމްބަރު އިބްރާހިމް ޝަރީފް ރިޔާސަތުގެ ގޮނޑި ކޮޅުގައި އިށީންނެވުމަކީ ވެސް ބަލައިގަނެވޭނެ ކަމެއްނޫން ކަމަށް ޑިމޮކްރެޓްސް އިން ވަނީ ބުނެފައެވެ.
މީގެ އިތުރުން މަޖިލީހުގައި އެމްޑީޕީ މެމްބަރުންގެ އަމަލުތައް މިއަދު ބެހެއްޓެވީ ވަރަށް ނާތަހުޒީބު ގޮތަކަށް ކަމަށާއި، އެފަދަ އަމަލުތައް ނުހިންގުމަށް ޑިމޮކްރެޓްސް އިން ވަނީ ގޮވާލާފައެވެ. އަދި އެމްޑީޕީ މެންބަރުން މިއަދު މަޖިލީހުގައި ހިންގި އަމަލުތަކުގައި ޖިނާއީ ކުށެއްވާނަމަ ބަލައިދިނުމަށްވެސް ކަމާބެހޭ މުވައްސަސާތަކަށް ޑިމޮކްރެޓްސް އިން ވަނީ ގޮވާލާފައެވެ.
