ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިއަށް ގެންދެވޭނެ ގޮތެއް ހޯދުމަށް އެމްޑީޕީއިން ސްޕްރީމް ކޯޓަށް މައްސަލަ ހުށަހަޅަން ނިންމައިފިއެވެ.
49 މެންބަރުންގެ ސޮޔާއެކު އެމްޑީޕީގެ ޕާލަމެންޓްރީ ގުރޫޕުން ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ އޮތީ މިއަދަށް އެޖެންޑާކޮށްފައެވެ.
ނަމަވެސް މަޖިލީހުގެ ނައިބު ރައީސް އީވާ އާލާސްކަންފުޅާ އުޅުއްވާތީ މިއަދުގެ ޖަލްސާ ކުރިއަށް ނުގެންދެވޭނެ ކަމަށް މަޖިލީހުން ވަނީ ނިންމައިފައެވެ.
މިކަމާ ގުޅޭ ގޮތުން ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤް ވިދާޅުވީ ޖަލްސާ ކުރިއަށްގެންދެވޭނެ ގޮތެއް ހޯދުމަށް ސްޕްރީމް ކޯޓަށް މައްސަލަ ހުށަހަޅަން ނިންމާފައިވާ ކަމަށެވެ.
ނަޝީދު ވަކިކުރުމުގެ މައްސަލަ ނުނިމެނީސް މަޖިލީހުގެ އެއްވެސް މަސައްކަތަކަށް އެއްބާރުލުން ނުދިނުމަށް އެމްޑީޕީން ވަނީ ނިންމައިފައެވެ.
މިއަދުގެ ޖަލްސާ ކުރިއަށް ނުގެންދެވޭނެ ކަމަށް މަޖިލީހުން ނިންމުމުން އެމްޑީޕީ މެންބަރުން ވަނީ މަޖިލީހުގެ އިދާރާގައި ހުރި ބައެއް ތަކެއްޗަށް ވެސް ގެއްލުންދީފައެވެ.
