ޔަހުދީ އިޒްރޭލުގެ އަނިޔާވެރި ކަމުގެ ޝިކާރައަކަށްވެފައިވާ ފަލަސްތީންގެ ރައްޔިތުންނާއި، ގުދުސް ސަލާމަތް ކުރުމަށް ވީހާވެސް ގިނަ ފަރާތްތަކުން މިހާރަށް ވުރެން ބޮޑަށް ދުޢާ ކޮށްދީ, ކުޅަދާނަވީ މިންވަރަކުން އެހީތެރިވުމަށް އަދާލަތު ޕާޓީން ގޮވާލައިފިއެވެ.  

އަދާލަތުން މިއަދު ކުރި ޓުވީޓެއްގައި ވަނީ ދިވެހި އެންމެހާ ރައްޔިތުން، ފަލަސްޠީނުގެ ބިންތަކަށް ގަދަކަމުން ވެރިވެގެން އުޅޭ ސިޙްޔޫނީން ޣައްޒާއިން ފެނާއި، ކާނާއާއި، ބޭސްފަރުވާ އާއި ކަރަންޓާއި މުވާޞަލާތީ ޚިދުމަތް ކަނޑާލުމަށްފަހު ފަލަސްޠީނުގެ ރައްޔިތުންނާ ދެކޮޅަށް ހިންގާ އަނިޔާވެރި ޤަތުލުޢާންމު ހައްދުން ނެއްޓިފައިވާ މި ދަނޑިވަޅުގައި ފަލަސްޠީނުގެ މުސްލިމުންނާއި ޤުދުސްގެ ޙިމާޔަތުގައި ދުޢާ ދެންނެވުން އިތުރު ކުރުމަށް ގޮވާލާފައެވެ.

މީގެ އިތުރުން ފަލަސްޠީނުގެ ޙައްޤުގައި އަޑު އުފުލުމާއި އެ ރައްޔިތުންނަށް އެހީތެރި ވުމަށް އެމީހަކަށް ކުޅަދާނަވީ މިންވަރަކުން ކުރެވެން ހުރި ކޮންމެ ކަމެއް ކުރުންމަތީ ދެމިތިބުމަށް ވެސް އަދާލަތު ޕާޓީން ވަނީ ގޮވާލާފައެވެ.

އިޒްރޭލުގެ ޔަހޫދީން މި މަހުގެ 7 ވަނަ ދުވަހުން ފެށިގެން މެދު ކެނޑުމެއްނެތި ފަލަސްތީނަށް ދެމުން އަންނަ ވަރުގަދަ ހަމަލާތަކުގައި ރޭ ޣައްޒާއަށް ދިން ވައިގެ ހަމަލާގައި އެކަނި ވެސް 100 އާ ގާތް ކުރާ އަދަދެއްގެ އަސްކަރީ ޖެޓް ބޭނުންކޮށްފައިވާއިރު ހުއްޓުމެއް ނެތި، ވަނީ ޣައްޒާ އަށް ބޮން އަޅާފައެވެ.

ޣައްޒާގައި ފޯނާއި އިންޓަނެޓުގެ ހިދުމަތް ރޭގެ ވަރުގަދަ ހަމަލާތަކާއެކު މެދުކެނޑުމާ ގުޅިގެން އެއްވެސް މީޑިއާއަކުން ޣައްޒާއިން ޝަހީދުވި މީހުންގެ އަދަދާއި ޒަހަމްވި މީހުންގެ ޖުމްލަ އަދަދު ހާމަކޮށްދީފައެއް ނުވެއެވެ.

ނަމަވެސް އެންމެ ފަހުން އެ ޤައުމުގެ ހެލްތު މިނިސްޓްރީން ދީފައިވާ އަޕްޑޭޓްގައި ބުނީ އިއްޔެ ހަވީރާއި ހަމައަށް ހަމަލާތަކުގައި ޝަހީދުވެފައިވާ ފަލަސްތީނުގެ ރައްޔިތުންގެ އަދަދު 7،326 އަރާ ކަމަށެވެ.