ރާއްޖޭގައި މީހުން ދިރިއުޅޭ ހުރިހާ ރަށެއްގައި ހުންނަ އެންމެ ބޮޑު މިސްކިތެއްގައި މާދަމާރޭ ހަނދުކޭތަ ނަމާދުކުރުން އޮންނާނެ ކަމަށް އިސްލާމިކް މިނިސްޓްރީއިން ބުނެފިއެވެ.
އިސްލާމިކް މިނިސްޓްރީއިން މިރޭ ސިޓީ ކައުންސިލުތަކުގެ އިދާރާތަކާއި އަތޮޅު ކައުންސިލުތަކުގެ އިދާރާތަކާއި ރަށު ކައުންސިލުތަކުގެ އިދާރާތަކަށް ފޮނުވި ސާކިއުލާއެއްގައި ބުނެފައިވަނީ, މާދަމާރޭ ހަނދުކޭތައެއް ހިފާނެ ކަމަށާއި މި ހަނދުކޭތަ ހިފަން ފަށާނީ ރާއްޖެ ގަޑިން 23:01 ގައި ކަމަށެވެ. އަދި މި ކޭތަ އެންމެ ބޮޑަށް ހިފާފައި ހުންނާނީ އެރޭގެ މެންދަމުން އަލިވެ 1:14 ގައި ކަމަށާއި ކޭތަ ވީއްލާނީ ރާއްޖެ ގަޑިން މެންދަމުން އަލިވެ 3:26 ގައި ކަމަށެވެ.
އެހެންކަމުން ރާއްޖޭގައި މީހުން ދިރިއުޅޭ ހުރިހާ ރަށެއްގައި ހުންނަ އެންމެ ބޮޑު މިސްކިތެއްގައި މާދަމާރޭ މެންދަމުން އަލިވެ 1:15 ގައި ކޭތަ ނަމާދުކުރެވޭނެ އިންތިޒާމު ކައުންސިލު އިދާރާތަކުން ހަމަޖެއްސުމަށް ސާކިއުލާގައި އެދިފައިވެއެވެ.
މިނިސްޓްރީއިން ބުނީ ކޭތަ ނަމާދުގެ ޚުޠުބާ މާދަމާ ހެނދުނު އެ މިނިސްޓްރީގެ ވެބްސައިޓުގައި އަޕްލޯޑްކުރާނެ ކަމަށެވެ.
ކީރިތި ރަސޫލާ (ޞޢޥ) ގެ ހަދީސެއްގައިވާ ގޮތުން އިރާއި ހަނދަކީ މާތް ރަސްކަލާނގެ އާޔަތްތަކުގެ ތެރެއިން ދެ އާޔަތެވެ. ޔަޢުނީ އެ އިލާހުގެ ކުޅަދުންވަންތަކަމުގެ ހެކިތަކުގެ ތެރެއިިން ދެ ހެއްކެވެ. ކޭތަ ހިފަނީ މީީހަކު މަރުވުމަކުން ނުވަތަ މީހަކު އުފަންވުމަކާ ގުޅިގެން ނޫންކަން ފާހަގަކުރައްވައި އެކަލޭގެފާނު ވަނީ ކޭތަ ފެނުމުން, ކޭތަ ވީއްލަންދެން ދުއާކޮށް ނަމާދުކުރުމަށް ވެސް ވަސިއްޔަތް ކުރައްވައިިފައެވެ.
