އޭނާގެ ސަރުކާރެއްގައި ކޮރަޕްޝަނަށް މަގުފަހިވާފަދަ ކަމެއް ކުރާ ފަރާތެއް ފާހަގަވެއްޖެނަމަ އިސްވެ އެ މީހަކަށް ފިޔަވަޅު އަޅުއްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ރޭ ވިދާޅުވެއްޖެއެވެ.
ލ.ގަމުގެ އަލަށް އާބާދުވާ ސަރަހައްދުގައި ރޭ ބޭއްވި ޖަލްސާގައި މުޢިއްޒު ވިދާޅުވީ އޭނާގެ ސަރުކާރެއްގައި ކޮރަޕްޝަނަށް މަގުފަހިވާފަދަ އެއްވެސް ކަމެއް ކުރުމުގެ ފުރުސަތު ނުދޭނެ ކަމަށެވެ.
“އެފަދަ ކަމެއް ކުރާ ފަރާތެއް ފާހަގަވެއްޖެއްޔާ އަޅުގަނޑު އިސްވެ އެމީހަކަށް ފިޔަވަޅު އަޅާނަން“ ކަމަށް ވެސް މުޢިއްޒު ވިދާޅުވިއެވެ.
މުޢިއްޒު ވިދާޅުވީ އޭނާ ބޭނުންވަނީ އަމާނާތްތެރިކަމާއެކު ސީރިއަސް މަސައްކަތެއް ކޮށް ރައްޔިތުންނަށް ނަތީޖާ ނެރެދެން ކަމަށާއި އިޚުލާސްތެރި ތެދުވެރި މަސައްކަތެއް ކުރުމަށް މެނުވީ އެއްވެސް މީހަކަށް އޭނާގެ ޓީމަކަށް ނާދެވޭނެ ކަމަށެވެ.
އަދި އެންމެ މުހިންމު ކަމަކީ ގައުމުގެ މިނިވަންކަން ޔަގީން ކުރުން ކަމަށާއިި އެންމެ ފުރަތަމަ ދުވަހު ޑިޕްލޮމަސީގެ ރިވެތި އުސޫލުން އިންޓަރނޭޝަނަލް ބެސްޓް ޕްރެކްޓިސް ބޭނުންކޮށްގެން މިނިވަންކަން ހިމާޔަތް ކޮށްދެއްވާނެ ކަމަށް މުޢިއްޒު ވިދާޅުވިއެވެ.
