މިއަހަރު ޖޫންމަހުގެ 18 ވަނަދުވަހު ކެނެޑާގެ ބްރިޓިޝް ކޮލަމްބިއާގައި ސިކުންގެ މަޝްހޫރު ލީޑަރ ހަރދީޕް ސިންގހް ނިއްޖާރު ބަޑިޖަހާ މަރާލުމުގައި އިންޑިއާ ސަރުކާރުގެ ބައިވެރިވުން އޮތް ކަމަށް ބެލެވޭކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވެއްޖެއެވެ.

އެމަނިކުފާނުގެ ވާހަކަފުޅުގައި ވިދާޅުވީ އެކަމުގައި ނިއުދިއްލީގެ ބައިވެރިވުން އޮތްކަން ކެނެޑާގެ އިންޓެލިޖެންސް އޭޖެންސީ ތަކަށް ގަބޫލުކުރެވޭވަރަށް ހެކި ލިބިފައިވާކަމަށެވެ. ޕާރލަމެންޓުގައި ވާހަކަފުޅު ދައްކަވަމުން ޓްރޫޑޯ ވިދާޅުވެފައިވަނީ މިފަދަ ޓެރެރިޒަމްގެ ޢަމަލުތަކަކީ ގަބޫލުކުރެވޭނެ ކަމެއް ނޫންކަމަށާއި މިކަމުގެ ސަބަބުން ސިޔާސީގޮތުން ބޮޑު ހަމަނުޖެހުމެއް އަތުވެދާނެކަމަށެވެ. އަދި އަމުދުން ސްޓޭޓް ސްޕޮންސަރޑް ޓެރެރިޒަމްގެ ނުރައްކާތެރިކަން ދެނެގަންނަން ޖެހޭކަމަށެވެ. މިއީ ކުރެވޭ ހީއެއް ނޫންކަމަށް އިންޑިއާގެ ބޮޑުވަޒީރު ނަރެންދްރަ މޯޑީއަށް ޖީ-20 ގެ ވެރިންގެ ބައްދަލުވުމުގައި މިވާހަކަ މިގޮތަށް ދަންނަވައިފާ ވޭނޭކަމުގައި ވިދާޅުވިއެވެ.

ނިއްޖާރަކީ އިންޑިއާގައި ސިކުންގެ ވަކި ދައުލަތެއް ކާލިސްތާނުގެ ނަމުގައިއުފެއްދުމަށް ވަކާލާތު ކުރައްވަމުން ގެންދަވާ ވަރަށް އިސް ބޭފުޅެކެވެ. އަދި އެ ބޭފުޅާއަކީ ކާލިސްތާން އުފެއްދުމަށް ކުރަމުންގެންދާ މަސައްކަތުގައި ފަހަކަށް އައިސް މަރާލެވުނު ތިންވަނަ ލީޑަރެވެ. 

މިއަހަރު ޖޫންމަހުގެ ތެރޭގައި ކާލިސްތާން ލިބަރޭޝަން ފޯސްގެ އެންމެ އިސްވެރިޔާ އަވްތާރު ސިންގހް ޚަންދާ ވަނީ އިނގިރޭސި ވިލާތުގެ ބާރމިންގހަމްގައި މަރާލާފައެވެ. ބީ. ބީ. ސީ. އިން ޚަބަރު ދީފައިވާ ގޮތުގައި އޭނާ މަރާލާފައިވަނީ ވަރަށް ގޮތްނޭންގޭ ޙާލަތެއްގައެވެ. އޭގެކުރިން މިއަހަރު މޭ މަހުގެތެރޭގައި ޕާކިސްތާނުގެ ޕަންޖާބުގައި ސިކުންގެ އެހެންލީޑަރަކު ކަމުގައިވާ ޕަރަމްޖީތު ސިންގްހް ޕަންޖްވާރުގެ ބޮލަށް ބަޑިޖަހާ މަރާލާފައި ވެއެވެ.  

އިންޑިއާ ސަރުކާރުން ބުނަމުންގެންދަނީ ސިކުންގެ އަމިއްލަ ދައުލަތެއްއުފެއްދުން ހުއްދަ ނުކުރެވޭނެ ކަމަށެވެ. ނިއްޖާރު ބަޑިޖަހާ އަވަހާރަކޮށްލުމާއިގުޅިގެން އިންޑިއާ ސަރުކާރާ ދެކޮޅަށް ކެނެޑާ ލަންޑަން މެލްބޯރން އަދި ސޭންފްރާނަސިސްކޯގައި މުޒާހަރާތައް ހިނގަމުން އެބަދެއެވެ.

އެމީހުން ބޭނުންވަނީ ސިކުންގެ ދައުލަތް ކާލިސްތާން އުފަންކުރުވުމަށެވެ.ކެނެޑާއަކީ އިންޑިއާގެ ޕަންޖާބު ފިޔަވައި ދުނިޔޭގައި އެންމެގިނަ ސިކުން ދިރިއުޅެމުން ގެންދާ އެއް ގައުމެވެ.                                           

އިންޑިއާގެ ޚާރިޖިއްޔާއިން ވިދާޅުވަނީ ކެނެޑާއިން އެ ދައްކަނީ އެއްވެސް ތާކުން ތާކު ނުޖެހޭ ވާހަކައެއް ކަމަށެވެ. އެހެންނަމަވެސް ކެނެޑާގެ ބޮޑުވަޒީރު އެއަށް ރައްދު ދެއްވައި ވިދާޅުވެފައިވަނީ އެ ގައުމަކީ ގާނޫނީ ވެރިކަމެއް ހިނގާ ގައުމެއް ކަމަށާއިއަދި ގާނޫނު ތަންފީޒު ކުރުމަކީ އެންމެ ބޮޑަށް އިސްކަންދޭނެ ކަންތައް ކަމަށެވެ.        

މި މައްސަލައާއި ގުޅޭގޮތުން ކެނެޑާގައި ހުންނަވާ އިންޑިއާގެ ވަރަށް އިސް ޑިޕްލޯމެޓަކު ވަނީ ފޮނުވާލާފައެވެ. މިއަށް ރައްދު ދިނުމުގެ ގޮތުން އިންޑިއާގެ ދާޚިލީ ކަންތައްތަކުގެ ތެރެއަށް ވަންނަނީ ކަމަށް ބުނެ އިންޑިއާގައި ހުންނަވާ ކެނެޑާގެ ޑިޕްލޯމެޓަކުވެސް ވަނީ ފޮނުވާލާފައެވެ.

ބޮޑުވަޒީރު ޓްރޫޑޯ ވިދާޅުވެފައިވަނީ ހަރްދީޕް ސިންގހްގެ މަރުގެ މައްސަލައިނގިރޭސި ބޮޑުވަޒީރު ރިޝީ ސްނަކްއާއި އެމެރިކާގެ ރައީސް ބައިޑްންއާވެސްދަންނަވާފައި ވާނެކަމަށެވެ. އަދި ކެނެޑާއިން މި މައްސަލަ އަކީ ބޮޑުކަމަކަށް ވެގެން މިއުޅެނީ އިންޑިއާ ރުޅިއަރުވަން ނޫންކަމަށާއި ކެނެޑާއަކީ އެ ގައުމުގައި ދިރިއުޅޭހުރިހާ ރައްޔިތުންނަށް އަމާން ގައުމެއްކަން ކަށަވަރުކުރުމުގެ ބޭނުމުގައެވެ. 

އިންޑިއާއިންވެސް މި މައްސަލަ ސީރިއަސް ގޮތުގައި ތަހްގީގުކުރާނެކަމަށް އުންމީދު ކުރާ ކަމަށެވެ. އެހެންނަމަވެސް އިންޑިއާއިން ބުނަމުން ގެންދަނީ ނިއްޖާރަކީ ޓެރަރިސްޓެއްކަމަށާއި ކާލިސްތާނު އުފައްދަން މަސައްކަތް ކުރުމަކީ ޓެރަރިޒަމްގެ އަމަލެއް ކަމަށެވެ.