ރީ-ރަޖިސްޓަރީވުމަށް ހުށަހެޅި ފޯމުތަކާ ގުޅޭ ގޮތުން ޖުމްލަ 361 ޝަކުވާ ލިބިފައިވާ ކަމަށާއި އެ ޝަކުވާތަކަށް ޖަވާބުދެމުން އަންނަ ކަމަށް އިލެކްޝަންސް ކޮމިޝަނުން މިއަދު ބުނެފިއެވެ.
ރިޔާސީ އިންތިޚާބުގެ ފުރަތަމަ ބުރުގައި ރީ-ރަޖިސްޓްރީވުމަށް 42867 ފޯމު ހުށަހެޅިއިރު ދެވަނަބުރުގައި ގާތްގަނޑަކަށް 47000 ފޯމު ހުށަހެޅިއެވެ.
ެއެ ފޯމުތަކުގެ ތެރެއިން ސައްހަވީ 38763 ފޯމު ސައްހަކަމަށް ނިންމިއިރު, 11284 ފޯމުގެ ސައްހަކަން ކަށަވަރު ނުވާ ކަމަށް އީސީން ވަނީ ނިންމާފައެވެ.
ރަޖިސްޓަރީ އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވައިލީ މިދިޔަ ބުރާސްފަތި ދުވަހުގެ ރޭގަނޑު 09:00 އިން ފެށިގެން ހޮނިހިރު ދުވަހުގެ ރޭގަނޑު 09:00 ގެ ނިޔަލަށެވެ.
އީސީން މިއަދު ބުނީ އެ މުއްދަތުގައި 361 ޝަކުވާ ލިބިފައިވާ ކަމަށެވެ.
“މައިގަނޑު ގޮތެއްގައި މި ޝަކުވާގެ ތެރޭގައި ހިމެނެނީ ރިޖެކްޓް ކުރި ފޯމުތަކާ ގުޅޭ ޝަކުވާ. އެމީހާ އަށް ނޭނގި އެމީހާގެ ނަމުގައި ސައްޙަ ނޫން ފޯމު ހުށަހަޅައިގެން ލިބިފައިވަނީ ވަރަށް މަދު ޝަކުވާއެއް. ލިބުނު ޝަކުވާތަކަށް އިލެކްޝަންސް ކޮމިޝަނުން ދަނީ ޖަވާބު ދެމުން.“ އީސީން ބުންޏެވެ.
ރިޔާސީ އިންތިޚާބު 2018 ގައި 103047 މީހުން ރީ-ރަޖިސްޓަރީ ކުރަން ހުށަހެޅިއެވެ. އޭގެ ފަސް ވަރަކަށް މަސްފަހުން ބޭއްވި ރައްޔިތުންގެ މަޖިލީހުގެ އިންތިޚާބު 2019 ގައި 20848 މީހުން އަދި ލޯކަލް ކައުންސިލްތަކުގެ އިންތިޚާބު 2020 ގައި، 29672 މީހުންވަނީ ރީ-ރަޖިސްޓަރީކުރިއެވެ.
