ކޮވިޑާ ގުޅިގެން ގެންނަން އުޅުނު ވެންޓިލޭޓަރުތަކަށް ވީ ގޮތް ރައްޔިތުންނަށް އެނގެންޖެހޭ ކަމަށާއި އެކަމުގައި ގެއްލުނު ފައިސާއަށް ވީ ގޮތް ސަރުކާރުން ރައްޔިތުންނަށް ބުނެދޭންޖެހޭ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރ.ހުޅުދުއްފާރުގައި ރޭ ބޭއްވި ޖަލްސާގައި ޑރ.މުޢިއްޒު ވިދާޅުވީ

ކޮރަޕްޝަން އިންތިހާއަށް މި ސަރުކާރުގައި ދިޔަ ދިޔުމަށް ޖަވާބެއް ނުދެވި މިއުޅެނީ ކީއްވެތޯ ރައްޔިތުން ސަރުކާރާ ސުވާލު ކުރަންޖެހޭ ކަމަށެވެ. 

ޑރ.މުޢިއްޒު ވިދާޅުވީ ކޮވިޑާ ގުޅިގެން ގެންނަން އުޅުނު ވެންޓިލޭޓަރުތަކަށް ވީ ގޮތާއި އެކަމުގައި ގެއްލުނު 30 މިލިއަން ރުފިޔާއަށް ވީ ގޮތް ރައްޔިތުންނަށް އެނގެންޖެހޭ ކަމަށެވެ.

“ކޮބައިތޯ ކޮވިޑްގައި ވެންޓިލޭޓަރުތައް ގެނައުމަށް ޚަރަދުކުރި 30 މިލިއަން ރުފިޔާ. މިއަށް ސަރުކާރުން ޖަވާބުދާރީ ވާންވީ ނޫންތޯ؟“

މީގެއިތުރުން މުޢިއްޒު ވިދާޅުވީ ތިލަމާލެ ބްރިޖު އެޅުމަށް 190 މިލިއަން ޑޮލަރު ޚަރަދުކޮއްފި ކަމަށާއި އަދި އެންމެ ތަނބެއްވެސް ނުފެން ކަމަށެވެ. ރައީސް ޔާމީން ޢަބްދުލްޤައްޔޫމުގެ ސަރުކާރުގައި އަޅާއިފައިވާ ބުރިޖް އެއީ ވެސް 190 މިލިއަން ޑޮލަރު ކަމަށާއި އެތަން އެއޮތީ ފެންނަން ކަމަށް މުޢިއްޒު ވިދާޅުވިއެވެ.

އެކަމަކު މިސަރުކާރުން އަޅާ ބްރިޖަށް 190 މިލިއަން ޚަރަދު ކުރި އިރު ބްރިޖް ވީނުވީ ތަނެއްވެސް ނޭނގޭ ކަމަށާއި ވޯޓަކަށް ރައްޔިތުންގެ ގާތަށް އަންނައިރު މި ސުވާލުތަކަށް ސަރުކާރުން ޖަވާބު ދޭންޖެހޭ ކަމަށް މުޢިއްޒު ވިދާޅުވިއެވެ.