ހޮނިހިރު ދުވަހު ބާއްވާ ރިޔާސީ އިންތިޚާބުގައި ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް ތާއީދުކުރައްވަން ނިންމަވާފައިވާކަން އައްޝައިޚް ޢަލީ ޒައިދު މިއަދު ހާމަކުރައްވައިފިއެވެ.
ޢަދާލަތު ޕާޓީއަށް ނިސްބަތްވެވަޑައިގަންނަވާ ޒައިދު މިއަދު ކުރެއްވި ޓުވީޓެއްގައި ވިދާޅުވީ ކުރިޔަށް އޮތް ރިޔާސީ އިންތިޚާބުގައި އޭނާގެ ތާއީދު އޮތީ ޑރ.މުޢިއްޒަށް ކަމަށެވެ.
“ކުރިޔަށް އޮތް ރިޔާސީ އިންތިޚާބުގައި އަޅުގަނޑުގެ ތާއީދު އޮތީ ޑރ.މުޢިއްޒު އަށް! މިގޮތަށް މިނިންމީ މިވަގުތު ގައުމުގެ ވެރިކަމަށް އެންމެ މުނާސަބު ކެނޑިޑޭޓަކީ ޑރ.މުޢިއްޒު ކަމުގައި އަޅުގަނޑަށް ގަބޫލުކުރެވޭތީވެ!“ ޒައިދު ލިޔުއްވާފައިވެއެވެ.
ޒައިދަކ މީގެ ކުރިން ރައީސް އިބްރާހިމް މުޙައްމަދު ޞާލިޙަށް ވަރަށް ބޮޑަށް ތައުރީފު ކުރައްވައި މި ސަރުކާރުގެ ދިފާއުގައި ވާހަކަ ދެއްކެވި ބޭފުޅެކެވެ. ނަމަވެސް ފަހަކަށް އައިސް ރައީސް އަށް ތާއީދުކުރައްވައި އެއްވެސް އެއްޗެއް ވިދާޅުނުވާތާ ދުވަސްތަކެއް ވެއްޖެއެވެ.
