މަކަރާއި ހީލަތް ހެދުމާއި މަނީ ލޯންޑަރިންގާއި އެނގިހުރެ ސައްހަނޫން ލިޔުން ދިނުމާއި މިބާވަތުގެ ތަފާތު 23 ދައުވާއެއް ކްރިމިނަލް ކޯޓުގައި އުފުލިފައިވާ ޝަރީޢަތަށް ޙާޟިރުނުވެ، ޢަދުލްއިންޞާފަށް ފިލައިގެން އުޅޭ، މ. ހަނީސަކްލް ޙުސައިން ޝިފާޢު ހޯދުމަށް، އިންޓަރޕޯލް ރެޑްނޯޓިސް ނެރެފިއެވެ.
އިތުރު މީހަކާ ބައިވެރިވެގެން ”ކިންގްޑަމް އޮފް ފްރުޓްސް“ ކުންފުނި މެދުވެރިކޮށް ރާއްޖެއިން ބޭރުގެ ކުންފުނިތަކުގެ މުދާ ރާއްޖެ އެތެރެކޮށް, އެ މުދަލަށް ބޭރު ކުންފުނިތަކުން ދައްކަންޖެހޭ ފައިސާ ދެއްކުމުގައި މަކަރާއި ހީލަތް ހަދާފައިވާ މައްސަލައިގައި ޝިފާއު ހައްޔަރުކުރީ މިދިޔަ ފެބްރުއަރީ ފަހުކޮޅުގައެވެ.
މި މައްސަލާގައި ހައްޔަރުކޮށްފައި ހުއްޓާ ކްރިމިނަލް ކޯޓުން ޝިފާޢު ބަންދުން ދޫކޮށްލީ މިދިޔަ މެއިމަހުގެ 27 ވަނަ ދުވަހުގެރޭގައެވެ. އެއާއެކު އެ މަހުގެ 29 ވަނަ ދުވަހު އޭނާ ވަނީ ރާއްޖެއިން ފުރައިގެން ގޮސްފައެވެ.
މި މައްސަލައިގައި ޝިފާއުގެ މައްޗަށް 23 ދައުވާއެއް ކުރުމަށް އޭޕްރީލް 26 ގައި ޕީޖީން ވަނީ ކްރިމިނަލް ކޯޓަށް ހުށަހަޅާފައެވެ.
އޭނާގެ މައްޗަށް ކުރަނީ އެނގިހުރެ ސައްހަނޫން ލިޔުމެއް ދިނުމުގެ ކުށުގެ 09 ދައުވާއާއި, މަކަރާއި ހީލަތް ހެދުމުގެ ކުށުގެ 07 ދައުވާ އަދި މަނީ ލޯންޑްރިންގެ ކުށުގެ 07 ދައުވާއެވެ.
މި ހުރިހާ ދައުވާތައް ސާބިތުވެއްޖެނަމަ މަދުވެގެން 38 އަހަރުގެ ޖަލު ހުކުމެއް އަންނާނެއެވެ.
ޕީޖީން މިރޭ ބުނީ ޝަރީޢަތަށް ހާޒިރުނުވެ އަދުލުއިންސާފަށް ފިލައިގެން އުޅޭ ޝިފާޢު ހޯދުމަށް އިންޓަރޕޯލް ރެޑްނޯޓިސް ނެރެފައިިވާ ކަމަށެވެ.
ވަގު ޓީޓީ ފޮނުވައިގެން ބޭރުގެ ކުންފުނިތަކުން ވިޔަފާރިކުރި މައްސަލައިގައި ހިމެނޭ ފައިސާގެ އަދަދަކީ 123,844.54 އެމެރިކާ ޑޮލަރެވެ.
