ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ރިޔާސީ ކެމްޕޭނަށް އުތުރުގެ ތިން އަތޮޅަކަށް ކުރައްވާ ދަތުރުފުޅު ފަށްޓަވައިިފިއެވެ.
މިއަދުން ފެށިގެން ސެޕްޓެމްބަރު 01 ވާ ހުކުރު ދުވަހުގެ ނިޔަލަށް ކުރައްވާ މި ދަތުރުފުޅުގައި ޑރ.މުޢިއްޒު ވަޑައިގަތުމަށް ހަމަޖެހިފައިވަނީ ރ.އަތޮޅާއި ބ.އަތޮޅާއި ޅ.އަތޮޅަށެވެ.
ފުރަތަމަ މަންޒިލަކީ ރ.އަލިފުށްޓެވެ. އެއަށްފަހު މިއަދު މަޑުއްވަރިއާއި މީދުއާއި އުނގޫފާރާއި ދުވާފަރަށް ވަޑައިގަންނަވާނެއެވެ. އަދި މިރޭ ދުވާފަރުގައި އޮންނަ ޖަލްސާގައި ޑރ.މުޢިއްޒު ބައިވެރިވެވަޑައިގަންނަވާނެއެވެ. މާދަމާގެ ފުރަތަމަ މަންޒިލެއްގެ ގޮތުގައި އިނގުރައިދުއަށް ވަޑައިގަތުމަށްފަހު ބ.ކުޑަރިކިލާއި ކެންދުއާއި ދަރަވަންދުއާއި އޭދަފުށްޓަށް ވަޑައިގަންނަވާނެއެވެ. އަދި އޭދަފުށީގައި މާދަމާރޭ އޮންނަ ޖަލްސާގައި ޑރ.މުޢިއްޒު ބައިވެރިވެވަޑައިގަންނަވާނެއެވެ.
ބުރާސްފަތި ދުވަހު ވަޑައިގަތުމަށް ހަމަޖެހިފައިވަނީ ބ.ތުޅާދުއާއި ޅ.ކުރެންދުއާއި އޮޅުވެލިފުށްޓާއި ނައިފަރަށެވެ. އަދި ބުރާަސްފަތި ދުވަހުގެރޭ ނައިފަރުގައި ޚާއްސަ ޖަލްސާއެއް ބާއްވަވާނެއެވެ.
ހުކުރު ދުވަހު ވަޑައިގަންނަވާނީ ހިންނަވަރަށެވެ. އެއަށްފަހު މެންދުރު ކުރީގައި މާލެއަށް ފުރާވަޑައިގަންނަވާނެއެވެ.
