ގދ.ގައްދޫ ސިއްހީ މަރުކަޒުގައި މުއްދަތު ހަމަވެފައިވާ އައިވީތަކެއް ކުޑަކުދިންތަކަކަށް ދިން މައްސަލައެއް ހޫނުވެ އެ މައްސަލަ ކަމާބެހޭ ފަރާތްތަކުން ބަލަން ފަށައިފިއެވެ.
ގައްދޫ ސިއްހީ މަރުކަޒުގައި އެޑްމިޓްކުރި ބައެއް މީހުންނަށް ދިނީ މިދިޔަ މަހު މުއްދަތު ހަމަވެފައިވާ އައިވީތަކެއްކަމަށް ބުނެ އެކަމާ ގުޅިގެން އެ ރަށު ބައެއް މީހުން ވަނީ މުޒާހަރާކޮށްފައެވެ.
ގައްދޫ ހެލްތު ސެންޓަރުގައި މުއްދަތު ހަމަވެފައިވާ އައިވީ ގުޅި މައްސަލަ އެ މިނިސްޓްރީގެ ސަމާލުކަމަށް އައިސްފައިވާކަން ފާހަގަކުރައްވައި ހެލްތު މިނިސްޓްރީން ވިދާޅުވީ އެ މައްސަލައާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.
އަދި މައްސަލަ ބަލައި ނިމެންދެން ހަތަރު މުވައްޒަފަކު ސަސްޕެންޑްކޮށްފައިވާ ކަމަށް ވެސް މިނިސްޓްރީން ބުންޏެވެ.
މިކަމާ ގުޅިގެން އެޗްއާރްސީއެމްއިން ވިދާޅުވީ ގައްދޫ ހެލްތު ސެންޓަރުން 4 ކުޑަކުއްޖެއް ގަޔަށް މުއްދަތު ހަމަވެފައިވާ އައިވީ ދީފައިވާ ކަމަށް ބުނާ މައްސަލައެއް ފެންމަތިވެފައިވާތީ އެ ކަންތައް ހިނގާދިޔަ ގޮތް ބެލުމުގެ މަސައްކަތް ކުރަމުންދާ ކަމަށެވެ. މިއީ ކުޑަކުދިންތަކެއްގެ ސިއްހަތާ ގުޅުންހުރި ކަމަކަށް ވާތީ މިކަމަކީ ކޮމިޝަނުން ނުހަނު ކަންބޮޑުވާކަމެއް ކަމަށް ވެސް އެ ކޮމިޝަނުން ވިދާޅުވިއެވެ. އަދި މި ކަމުގައި އިހުމާލުވެފައިވާ ފަރާތްތައް ހޯދައި މިފަދަކަމެއް ތަކުރާރު ވިޔަނުދިނުމަށް އެޅެންހުރި ފިޔަވަޅުތައް އެޅުމަށް މިނިސްޓްރީ އޮފް ހެލްތަށާއި ކަމާގުޅުން ހުރި އިދާރާތަކަށް ކޮމިޝަނުން ވަނީ ގޮވައިލައްވާފައެވެ.
