އިސްލާމީ އުސޫލުތަކާއި ހަމަތަކުގެ މަތީން ހަމަ ކޮންމެ މީހަކަށް ދިވެހިރާއްޖޭގެ ވެރިކަން ނުކުރެވޭނެކަން މާޒީގައި ވަރަށް ރަނގަޅަށް މިވަނީ އެނގިފައެވެ.

ހަމަ ކޮންމެ ކޮންމެ މީހަކީ ވެރިކަމުގެ ޝައުގުވެރިކަން ހުރިނަމަވެސް އިސްލާމީ ގައުމެއްގެ ވަލިއްޔުލް އަމްރުކަން ކުރެވޭނެފަދަ މީހަކަށް ނުވާނެއެވެ.

ނަމަވެސް މިއަދު މި ކުޑަކުޑަ ދިވެހިރާއްޖޭގައި ވެރިކަންކުރަން ޝައުގުވެރިވާ ގިނަފަރާތް ތަކެއް ފެންނަމުންދާ ކަމީ އުފާކުރަން ޖެހޭ ކަމެކެވެ. 

ތަންކޮޅެއް ކުރީގެ ދުވަސްވަރެއްގައި ވަކިމީހަކު ނެތިއްނަމަ ރާއްޖޭގެ ވެރިކަން  ނުކުރެވޭނެ ކަމަށް ގަބޫލްކުރި ދުވަސްވަރެއް ވެސް މާޒީވެހިގައްޖެއެވ. ނަމަވެސް މިއަދު އެވިސްނުމާއި ފިކުރު މިވަނީ ބަދަލުވެފައެވެ. އެތަކެއް ބަޔަކު މިދަނީ ވެރިކަން ކުރުމަށް ފޫގަޅައި ވެރިކަން ހޯދުމަށް މަސައްކަތްތަކެއް ކުރަމުންނެވެ. މިއަދު ޒުވާނުން ފެށިގެން މެދުއުމުރާއި އޭގެ މަތީ އުމުރުގެ އެތައްބަޔަކު ދަނީ ވެރިކަން ކުރުމުގެ ޝައުގުވެރިކަން ފާޅުކުރަމުންނެވެ.

ނަމަވެސް ހަނދާނުގައި ބަހައްޓަންވީ ކަމަކީ ، ވެރިކަމަކީ މާތްރަސްކަލާންގެމިންވަރުފުޅާއި އިރާދަފުޅުން އެމީހަކާއި ޙަވާލުކުރެވޭ މަތިވެރި އަމާނާތެއް ކަމެވެ.އެތައް ރައްޔިތެއްގެ މައްޗަށް އަމުރު މަޢުރޫފު ހިންގަން ޖެހޭ މަތިވެރި މަޤާމެއްކަމެވެ.

ބޭރުދުނިޔޭގައި އިސްލާމީ މި ދިވެހިރާއްޖެ ފަޟީހަތް ނުކޮށް ސަލާމަތް ކުރެވޭނެ ފަދަ ހުޝިޔާރު ކުޅަދާނަ ޢިލްމީ ގާބިލް ލީޑަރަކަށް ވާންޖެހެއެވެ. ގައުމުގެ ދީނާއި ސިޔާދަތާއި އިސްތިގްލާލް ދެމެހެއްޓޭނެ ފަދަ ޙިކުމަތްތެރި މުފައްކިރަކަށް ވާންޖެހެއެވެ.

މާތްވެގެންވާ އިސްލާމްދީނުގެ ދިފާއުގައި ބަސްބުނަން އެނގޭ އަދި ކެރޭ ހިތްވަރުގަދަ ޙިކުމަތްތެރި ވެރިއަކަށް ވާންޖެހެއެވެ. ކޮންމެފަދަ ޙާލަތެއްގައިވެސް ގައުމީ ވަންތަކަމާއި، ދިވެހިވަންތަ ސިފަތައް މިގައުމުން ފިލައިގެން ނުދިއުމަށް އަބަދާއަބަދު ވިސްނުންތެރި، ޙިކްމަތްތެރި ކަމާއިއެކު ހިތްވަރު ކުރައްވާނެ ފަހުލަވާނަކަށް ވާންޖެހެއެވެ. 

ދުޝްމަނުންގެ ނުބައި ރޭވުންތަކުންނާއި އެމީހުންގެ ކިބައިން އަންނަ އެކިއެކި ޙަމަލާތަކުން ރެކިވަޑައިގަންނަވަން ކެރޭ އެނގޭ ޙިކުމަތްތެރި އަދި ގައުމީ ޖޯޝްހުރި ބަތަލަކަށް ވާންޖެހެއެވެ. 

މިކަންކަމަށް ފުންކޮށް ވިސްނާވަޑައިގަތުމަށް ފަހު މިއަންނަ މަހު، އާދެ!ސެޕްޓެމްބަރ 9 ގައި ވެރިކަމުގެ ރޭހަށް މިހާރު ކުރިމަތި ލައްވާފައިވާ ކެންޑިޑޭޓުންގެ ތެރެއިން މިސިފަތައް ލިބިގެންވަނީ ކޮންބޭފުޅެއްކަން އަހުރެމެން ދިވެހީން ވަރަށް ފުންކޮށް ވިސްނަވައި ގޮތް ނިންމަން ޖެހޭނެއެވެ.

ލިބިދާނެ ވަގުތީ ފައިދާ އަކަށްޓަކައި ގައުމު ގުރުބާން ނުކުރާށެވެ. މާދަމާގެ ޖީލަށް މިގައުމު އަމާނާތްތެރި ކަމާއިއެކު ޙަވާލުކުރުމުގެ މަތިވެރި ޒިންމާ ބޮލުއަޅައިގެން މިއަދު ތިބި ބަޔަކީ އަޅުގަނޑުމެންނެވެ.

ހަނދާން ކުރައްވާށެވެ! 

ގައުމެއްގެ ޙާލަތު ބަދަލު ނުކުރައްވަތޭ އެ ގައުމެއް ޙާލަތު ބަދަލުކުރުމުގެ ފިކުރު އެބަޔެއްގެތެރޭގައި ނުވާނަމަ. އެހެންކަމަށްވާއިރު އެބަޔެއްގެ ޙާލަތު ރަނގަޅު ގޮތުގައި  ދެމެހެއްޓުމުގެ ޒިންމާވަނީ އެބަޔެއްގެ ތެދުވެރިކަމާއި ހެޔޮ ޢަމަލުގެ މަތީގައެވެ.