އަންނަ ރިޔާސީ އިންތިޚާބުގައި ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް ތާއީދުކުރައްވަން ނިންމަވާފައިވާ ކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖު މިރޭ ވިދާޅުވެއްޖެއެވެ.

އެމްޑީޕީގައި ރައީސް އިބްރާހިމް މުޙައްމަދު ޞާލިޙާއެކު ހުންނެވި ސިރާޖު މިއަދު ވަނީ އެ ޕާޓީން ވަކިވެވަޑައިގެންފައެވެ.

“އެމްޑީޕީގެ މެންބަރެއްގެ ގޮތުގައި އިތުރަށް ހުންނަން ބޭނުން ނުވާތީ މިއަދުން ފެށިގެން އެމްޑީޕީން އަޅުގަނޑު ވަކިވެއްޖައިން.“ މިއަދު ހެނދުނު ސިރާޖު ކުރެއްވި ޓުވީޓެއްގައިވެއެވެ.

އެއަށްފަހު ޑރ.މުޢިއްޒުއާއެކު ހުންނެވި ފޮޓޯއެއް ހިއްސާ ކުރައްވަމުން ސިރާޖު މިރޭ ކުރެއްވި ޓުވީޓުގައި ވިދާޅުވީ “ރިޔާސީ ރޭހުގައި ޑރ. މުޢިއްޒުއަށް ތާއީދުކުރަން އަޅުގަނޑު ނިންމައިފިން“ ކަމަށެވެ. އަދި 2018 ވަނަ އަހަރު ރިޔާސީ އިންތިޚާބުގައި ލ.އަތޮޅުން އެމްޑީޕީ ކެނޑިޑޭޓް ކުރި ހޯދިކަމުގައިވިޔަސް މި އިންތިޚާބުގައި އެކަން ބަދަލުކުރާނަން ކަމަށެވެ.