އަންނަ ރިޔާސީ އިންތިޚާބުގައި ވާދަކުރައްވަން ނިންމެވުމަށްފަހު އެ ނިންމެވުން އަނބުރާ ގެންދެވި ކުރީގެ ބަންޑާރަ ނައިބު ޑރ.މުޙައްމަދު މުނައްވަރު ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒަށް ތާއީދު ކުރައްވަން ނިންމަވައިފިއެވެ.
މި ނިންމެވުމާ ގުޅޭ ގޮތުން ސުވާލު ދެންނެވުމުން ޑރ.މުނައްވަރު މިއަދު ވިދާޅުވީ މިފަދަ ނިންމެވުމެއް ނިންމެވީ ގައުމުގައި ހުރި ބޮޑެތި މައްސަލަތައް ހައްލުކުރެވޭނެ ކެންޑިޑޭޓަކީ ޑރ.މުޢިއްޒު ކަމަށް ގަބޫލުކުރެއްވޭތީ ކަމަށެވެ.
އަންނަ ރިޔާސީ އިންތިޚާބުގައި އަމިއްލަ ގޮތުން ވާދަކުރެއްވުމަށް ބޭނުންވާ ޑރ.މުނައްވަރު ސޮއި ވެސް ހަމަކުރެއްވިއެވެ. އިންތިޚާބުގައި ވާދަކުރައްވަން ނިންމެވި ނިންމެވުން އަނބުރާ ގެންދެވިކަން ހާމަކުރެއްވީ ފޯމު ހުށަހެޅުއްވުމަށް އޮތް އެންމެ ފަހު ދުވަހުގައެވެ. ނަމަވެސް އިންތިޚާބުގައި ވާދަނުކުރަން ނިންމެވި ސަބަބެއް އޭރު ހާމައެއްނުކުރައްވައެވެ.
އެ ނިންމެވުން އަނބުރާ ގެންދެވީ މުޢިއްޒާ ވާހަކަ ދެކެވި އޭނާއަށް ތާއީދުކުރަން ނިންމެވުމަށްފަހުގައިތޯ ސުވާލު ދެންނެވުމުން މުނައްވަރު ވިދާޅުވީ އޭރު އެފަދަ މަޝްވަރާއެއް ކުރައްވާފައިނުވާނެ ކަމަށާއި މިއީ އޭގެ ފަހުން ނިންމެވި ގޮތެއް ކަމަށެވެ.
One Response
Maruhaba Dr. Munavvaru. Nation first!