ރިޔާސީ އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އިލެކްޝަންސް ކޮމިޝަނުން ރޭ އާންމުކޮށްފިއެވެ.
އިލެކްޝަންސް ކޮމިޝަނުން ކުރިން އާންމުކުރި ލިސްޓުގައިވާ ގޮތުން ޖުމްލަ 282,672 މީހުންނަށް މިފަހަރުގެ ރިޔާސީ ވޯޓުދިނުމުގެ ހައްގު ލިބިގެންވެއެވެ.
ނަމަވެސް ފައިނަލް ލިސްޓުގައިވާ ގޮތުން ވޯޓުދިނުމުގެ ހައްގު ލިބިގެންވަނީ 282,395 މީހުންނަށެވެ. މި ލިސްޓު ދިވެހި ސަރުކާރުގެ ގެޒެޓާއި އިލެކްޝަންސް ކޮމިޝަނުގެ ވެބްސައިޓުން ފެންނަން ހުންނާނެއެވެ.
މި ލިސްޓުގައިވާ ގޮތުން ރިޔާސީ އިންތިޚާބުގައި ބެހެއްޓުމަށް ހަމަޖެހިފައިވަނީ ޖުމްލަ 574 ވޯޓު ފޮށްޓެވެ. އޭގެތެރެއިން ހަ ފޮށި ބަހައްޓާނީ ރާއްޖެއިން ބޭރުގައެވެ.
އީސީގެ ނައިބު ރައީސް އިސްމާޢީލް ޙަބީބް ވިދާޅުވި ގޮތުން
ދިވެހިރާއްޖޭގެ ޝަރުއީ ކޯޓަކުން އަމުރު ކުރައްވައިގެން ނޫން ގޮތަކަށް ވޯޓުލާ މީހުންގެ ފައިނަލް ލިސްޓަށް އެއްވެސް ބަދަލެއް ނާންނާނެއެވެ. އަދި ފައިނަލް ލިސްޓަކީ އިސީގެ ވެބްސައިޓުގައި ދުވަހުން ދުވަހަށް އާންމުކުރަމުން ސިޔާސީ ޕާޓީތަކާ ލިސްޓު ހިއްސާ ކުރުމުގެ އިތުރުން ޝަކުވާއަށް ހުޅުވައި ޝަކުވާގެ މުއްދަތުގައި ލިބުނު ޝަކުވާތަކަށްވެސް ރިއާޔަތްކޮށްގެން ފައިނަލް ކުރެވިފައިވާ އެންމެ ފަހުގެ ލިސްޓު ކަމަށެވެ.
