ކޮރަޕްޝަނުގެ ބޮޑު މައްސަލައަކާއި ގުޅިގެން ޔޫކްރޭނުގެ ރައީސް ވޮލޮޑިމިރް ޒެލެންސްކީ ސިފައިންގެ ސަރަހައްދީ ވަޒީފާއާއި ބެހޭ މަރުކަޒުތަކާއި ހަވާލުވެ ތިބި މުވައްޒަފުންތަކެއް ވަޒީފާއިން ވަކިކޮށްފިއެވެ.
މިއަހަރުގެ ކުރީކޮޅުގައި އަސްކަރީ ބޭނުމަށް ހޯދާ ތަކެތީގެ ކޮރަޕްޝަނުގެ އެހެން މައްސަލައެއްގައި ޒެލެންސްކީވަނީ އެކަމާއި ހަވާލުވެ ތިބި މުވައްޒަފުންތަކެއްވެސް ވަޒީފާއިން ވަކިކޮށްފައެވެ. އަދި އެކަމާ ގުޅިގެން ކޮރަޕްޝަނުގެ ތުހުމަތުތަކެއް ކުރެވި ޚަބަރު މީޑިއާގައި ފެތުރުމުން އެގައުމުގެ ޑެޕިއުޓީ ޑިފެންސް މިނިސްޓަރު ވިޗެސްލާވް ޝަޕޮވާލޮވް ވަނީ މަގާމުން އިސްތިއުފާ ދެއްވައިފައެވެ.
މުވައްޒަފުންތަކެއް ވަޒީފާއިން ވަކިކޮށްފައިވާކަން ޒެލެންސްކީ ހާމަކުރެއްވީ ހުކުރުދުވަހު ދެއްވި ބަޔާނެއްގައެވެ.
”ނެޝަނަލް ސެކިއުރިޓީ އެންޑް ޑިފެންސް ކައުންސިލާއެކު ހަމަ ދެންމެ ބައްދަލުވުމެއް ބާއްވައިފިން. އެންމެ ބޮޑަށް ފާހަގަކުރެވުނު އެއް މައްސަލައަކީ އަސްކަރިއްޔާއަށް ރަޖިސްޓްރީކުރުމުގެ މަރުހަލާއާއި، އެންލިސްޓްމަންޓް އޮފީސްތައް ރަނގަޅަށް ބެލެހެއްޓުމުގެ މައްސަލަ.“ އޭނާ ވިދާޅުވިއެވެ.
”މިލިޓަރީ ރެޖިސްޓްރޭޝަން އަދި އެންލިސްޓްމަންޓް އޮފީސްތަކާއި ހަވާލުވެ ތިބި ވެރީންނާއި ދެކޮޅަށް މިހާތަނަށް ޖިނާއީ ކުށުގެ 112 މައްސަލައެއް ހުށައެޅި ދަނީ ތަހުގީގު ކުރެވެމުން.“ ޒެލެންސްކީ ވިދާޅުވިއެވެ.
